Manikrao Kokate: राजीनाम्याऐवजी माणिकराव कोकाटेंचं खातेबदल होणार? अजित पवारांची नाराजी

कृषीमंत्री माणिकराव कोकाटे यांचा सभागृहात रम्मी खेळतानाचा व्हिडीओ व्हायरल झाला होता. त्यानंतर त्यांनी सरकार भिकारी असल्याचे म्हणत वादग्रस्त वक्तव्य केले होते. यामुळे गेल्या काही दिवसांपासून राजकारण तापले आहे. अशामध्ये आज माणिकराव कोकाटे यांनी उपमुख्यमंत्री अजित पवार यांची भेट घेतली. या भेटीदरम्यान अजित पवार यांनी वादग्रस्त वक्तव्यावरून कोकाटे यांना फटकारले आणि नाराजी व्यक्त केली. या भेटीनंतर माणिकराव कोकाटे यांच्या राजीनाम्याऐवजी खातेबदल होणार असल्याची चर्चा होऊ लागली आहे.

राजीनाम्याऐवजी कोकाटेंचं खातेबदल होण्याची शक्यता आहे. माणिकराव कोकाटेंनी अजित पवारांची भेट घेतल्यानंतर ही चर्चा सुरू झाली आहे. 'बोलताना भान ठेवा, सतत चुका करता, कितीदा माफ करणार?', असे म्हणत अजित पवारांनी माणिकराव कोकाटे यांना तंबी दिली. तुमच्या वादग्रस्त वक्तव्यामुळे वारंवार सरकारची बदनामी होत असल्याचे म्हणत अजित पवार यांनी त्यांची चांगली कानउघडणी केली.