अजित पवारांसह विमानात ५ जण होते की ६ जण..? शंकांचं काहूर सुरू असतानाच उज्ज्वल निकम यांनी नेमकं काय सांगितलं? VIDEO

दिवंगत अजित पवार यांच्या विमानाचा अपघात झाला की घातपात? सुरुवातीला विमानात सहा जण होते, असं सांगण्यात येत होते, पण मृतदेह पाच मिळाले, अशी शंकाही उपस्थित करण्यात आली होती. राष्ट्रवादी काँग्रेसचे (AP) आमदार अमोल मिटकरी आणि महिला नेत्या रुपाली पाटील ठोंबरे यांनी माध्यमांशी बोलताना या विमान दुर्घटनेबाबत संशय व्यक्त करत चौकशीची मागणीही केली होती. त्यानंतर इतर राजकीय पक्षांतील नेत्यांकडूनही विमान दुर्घटनेवर शंका उपस्थित करण्यात येत आहे. शंका-कुशंकांचं काहूर माजलेलं असताना भाजप खासदार आणि ज्येष्ठ विधीज्ञ उज्ज्वल निकम यांनी याबाबत प्रतिक्रिया दिली आहे.

विमानात सहा जण होते याबाबत कोणताही पुरावा अद्याप समोर आलेला नाही. संशय निर्माण करून घटनेला कलाटणी देण्याचा प्रयत्न केला जात असल्याचंही ते म्हणाले. विमानात सहा प्रवासी होते असं अधिकृतरित्या कुठेही विमानतळावरील अधिकारी, विमान कंपनीनं जाहीर केलेले नाही. त्या विमानात इंधन इतकं होतं की सर्व मृतदेह जळून खाक झाले होते हे छायाचित्रांमध्ये बघितलेलं आहे. त्यामुळे अपघातात झालेल्या मृत्यूबद्दल वेगवेगळे संशय निर्माण करून कलाटणी दिली जात आहे, असं निकम म्हणाले.