Virat Kohli Record: किंग कोहली रचणार इतिहास! श्रीलंका दौऱ्यावर हे 'विराट' रेकॉर्ड करण्याची संधी

भारतीय संघाच्या श्रीलंका दौऱ्याची घोषणा झाली आहे. दोन्ही संघांमध्ये ३ वनडे आणि ३ टी-२० सामन्यांची मालिका रंगणार आहे. या दौऱ्यावरील टी-२० मालिकेला २७ जुलैपासून प्रारंभ होणार आहे. त्यानंतर ३ वनडे सामन्यांचा थरार रंगणार आहे. या दोन्ही मालिकांसाठी भारतीय संघाची घोषणा करण्यात आली आहे. भारताचा स्टार फलंदाज विराट कोहली विश्रांतीनंतर परतणार आहे. दरम्यान वनडे मालिकेत कमबॅक करताच त्याला २ मोठे रेकॉर्ड करण्याची संधी असणार आहे.

विराट कोहली हा भारतीय संघातील सर्वात अनुभवी खेळाडूंपैकी एक आहे. काही दिवसांपूर्वीच झालेल्या टी-२० वर्ल्डकप स्पर्धेतील फायनलनंतर त्याने टी-२० आंतरराष्ट्रीय क्रिकेटला रामराम केला आहे. त्यामुळे तो आता भारतीय संघाकडून टी-२० क्रिकेट खेळताना दिसून येणार नाही. श्रीलंकेविरुद्ध होणाऱ्या टी-२० मालिकेनंतर वनडे मालिका सुरु होणार आहे. महिन्याभराच्या विश्रातीनंतर विराट कोहली पुन्हा एकदा मैदानात खेळताना दिसणार आहे. विराटसह रोहित शर्मादेखील या मालिकेतून खेळताना दिसणार आहे.

विराटला हे २ मोठे रेकॉर्ड मोडण्याची संधी

विराट कोहलीच्या नावे एकापेक्षा एक मोठे रेकॉर्ड करण्याची नोंद आहे. या यादीत आणखी २ मोठ्या रेकॉर्ड्सची भर पडू शकते. विराट कोहली आंतरराष्ट्रीय क्रिकेटमध्ये २७ हजार धावा करण्यापासून ११६ धावा दुर आहे. तर वनडे क्रिकेटमध्ये १४ हजार धावा करण्यापासून तो अवघ्या १५२ धावा दुर आहे. आतंरराष्ट्रीय क्रिकेटमध्ये सर्वाधिक धावा करणाऱ्या फलंदाजांच्या यादीत तो चौथ्या स्थानी आहे. तर सर्वाधिक धावा करण्याचा विक्रम हा मास्टर ब्लास्टर सचिन तेंडुलकरच्या नावे आहे. सचिने ३४,३५७ धावा केल्या आहेत.

आतंरराष्ट्रीय क्रिकेटमध्ये सर्वाधिक धावा करणारे फलंदाज

सचिन तेंडुलकर- ३४३५७ धावा

कुमार संगकारा - २८०१६ धावा

रिकी पाँटिंग- २७४८३ धावा

विराट कोहली - २६८८४ धावा

महेला जयवर्धने- २५९५७ धावा

जॅक कॅलिस- २५५३४ धावा

राहुल द्रविड- २४२०८ धावा