Virat Kohli Wicket: विराट कोहली आऊट नव्हताच! मात्र एका चुकीमुळे माघारी परतावं लागलं, Rohit भडकला -VIDEO

IND vs BAN, Virat Kohli Wicket: भारत आणि बांगलादेश यांच्यात सुरू असलेल्या पहिल्या सामन्यातील दुसऱ्या दिवसाची समाप्ती झाली आहे. दुसऱ्या डावातही भारतीय संघाला हवी तशी सुरुवात मिळू शकलेली नाही. रोहित शर्मा, यशस्वी जयस्वाल पाठोपाठ विराट कोहलीही स्वस्तात माघारी परतला आहे. मात्र विराट कोहली आऊट नव्हताच. रिप्ले पाहिला असता रोहित शर्माही भडकल्याचे पाहायला मिळाले आहे.

पहिल्या डावात ६ धावांवर तंबूत परतणाऱ्या विराटला या डावात चांगली सुरुवात मिळाली होती. त्यामुळे तो मोठी खेळी करणार असं वाटत होतं. मात्र तो मिराझच्या फिरकीच्या जाळ्यात अडकला. मिराझने टाकलेला चेंडू विराटच्या पॅडला जाऊन धडकला. मिराझने अपील केली असता, अंपायरने त्याला बाद घोषित केलं. विराटलाही विश्वास बसत नव्हता. त्याने जाऊन गिलसोबत चर्चा केली. दोघांमध्ये चर्चा झाल्यानंतर विराट डीआरएस ने घेताच माघारी परतला. इथेच त्याची मोठी चूक झाली.

ज्यावेळी रिप्ले दाखवण्यात आला, त्यावेळी चेंडू पॅडला लागण्यापूर्वी बॅटला लागल्याचं दिसून आलं. स्निकोमध्ये चेंडू बॅटला स्पर्श होऊन गेल्याचं दिसून आलं. हे पाहून कर्णधार रोहित शर्मा भडकला. त्याचं म्हणणं होतं की, विराटने डीआरएस घ्यायला हवा होता. विराट १७ धावा करत माघारी परतला.

विराट कोहली या सामन्यातील पहिल्या डावातही फ्लॉप ठरला होता. पहिल्या डावात तो अवघ्या ६ धावा करत तंबूत परतला होता. तर रोहित शर्मादेखील ६ धावा करत माघारी परतला होता. शुभमन गिलला तर भोपळाही फोडता आला नव्हता. या डावात आर अश्विनने भारतीय संघाकडून सर्वाधिक १०८ धावांची खेळी केली. तर रविंद्र जडेजाने ८६ आणि यशस्वी जयस्वालने ५६ धावा केल्या. या खेळीच्या बळावर भारताने ३७६ धावांपर्यंत मजल मारली.