Ind vs SA: भारतीय कसोटी संघाची घोषणा, दुसरं मोठं संकट परतवून लावणाऱ्या धाकड क्रिकेटपटूची एन्ट्री, दोघांना बाहेरचा रस्ता

एन जगदीशन आऊट, ऋषभ इन!

भारतीय संघानं अखेरची कसोटी मालिका वेस्ट इंडीजविरुद्ध खेळली होती. त्या मालिकेत भारतीय संघानं दर्जेदार कामगिरी केली होती. आता दक्षिण आफ्रिकाविरुद्धच्या कसोटी मालिकेसाठी संघात दोन बदल करण्यात आले आहेत. ऋषभ पंत हा इंग्लंड मालिकेदरम्यान जखमी झाला होता. त्यामुळं संघातून बाहेर झाला होता. त्यावेळी ध्रुव जुरेल याच्याकडं यष्टीरक्षणाची जबाबदारी दिली होती. बॅकअप विकेटकीपर म्हणून एन जगदीशनला संघात संधी दिली होती. आता ऋषभच्या पुनरागमनामुळं जगदीशनला संधी दिली नाही. विकेटकीपिंगसाठी पहिली पसंती ऋषभ पंतला असणार आहे. तर ध्रुव जुरेलला फलंदाज म्हणून संघात स्थान दिलं जाऊ शकतं.

प्रसिद्ध कृष्णा बाहेर, आकाशदीपचं कमबॅक

भारतीय संघाच्या गोलंदाजीत आणखी एक बदल करण्यात आला आहे. वेगवान गोलंदाज प्रसिद्ध कृष्णाला संघात स्थान दिलेलं नाही. त्याच्या जागी आकाश दीपला संधी दिली आहे. प्रसिद्ध कृष्णा भारत अ संघात खेळणार आहे. हे दोन बदल वगळता वेस्ट इंडीजविरुद्ध खेळणारा संघ कायम आहे. यशस्वी जयस्वाल आणि केएल राहुल सलामीला मैदानात उतरतील. तर वेगवान गोलंदाजीची धुरा मोहम्मद सिराज, जसप्रीत बुमराह आणि आकाशदीपच्या खांद्यावर असणार आहे.

भारत-दक्षिण आफ्रिका कसोटी मालिकेचं वेळापत्रक

भारत विरुद्ध दक्षिण आफ्रिका कसोटी मालिकेतील पहिला सामना १४ नोव्हेंबरपासून कोलकाताच्या ईडन गार्डनवर खेळवला जाईल. त्यानंतर दुसरा सामना २२ नोव्हेंबरपासून गुवाहाटीत खेळवण्यात येईल. या मालिकेतील सामने हे वर्ल्ड टेस्ट चॅम्पियनशिपनुसार होतील. त्यामुळे या मालिकेला विशेष महत्व आहे. भारतीय संघ वर्ल्ड टेस्ट चॅम्पियनशिपच्या गुणतालिकेत तिसऱ्या स्थानी आहे. या मालिकेतील दोन्ही सामने जिंकून पॉइंट्स पर्सेंटेज वाढवण्याचा टीम इंडियाचा प्रयत्न असेल.

भारतीय संघ पुढीलप्रमाणे -

यशस्वी जयस्वाल, केएल राहुल, शुभमन गिल (कर्णधार), साई सुदर्शन, ऋषभ पंत (उपकर्णधार-विकेटकीपर), देवदत्त पडिक्कल, ध्रुव जुरेल, रवींद्र जडेजा, वॉशिंग्टन सुंदर, जसप्रीत बुमराह, अक्षर पटेल, नितीश कुमार रेड्डी, मोहम्मद सिराज, कुलदीप यादव, आकाश दीप.