T20 WC 2026: टॉपर दक्षिण आफ्रिका पुन्हा 'चोकर्स'; न्यूझीलंडने दिमाखात गाठली फायनल, पाच पराभवांचा घेतला बदला

फिन ॲलनची विक्रमी सेंच्युरी आणि टिम सिफर्टच्या कडक अर्धशतकाच्या जोरावर गत उपविजेत्या दक्षिण आफ्रिकेला एकतर्फी धूळ चारत न्यूझीलंडने दिमाखात फायनलमध्ये धडक मारली. कोलकात्यातील ईडन गार्डन्सच्या मैदानावर या दोन्ही संघात सामना झाला. यंदाच्या टी-२० वर्ल्ड कपमध्ये दक्षिण आफ्रिकेचा संघ अपराजित राहत सेमीफायनलपर्यंत पोहोचला होता. दुसरीकडे न्यूझीलंडचा संघ ‘जर-तर’च्या समीकरणात अडकला होता, पण सेमी फायनलच्या सामन्यात मात्र त्यांनी कमाल करत दक्षिण आफ्रिकेला पराभूत केलं.

रनरेटच्या जोरावर न्यूझीलंडने उपांत्य फेरी गाठली होती. याच स्पर्धेत दक्षिण आफ्रिकेविरुद्ध पाच वेळा त्यांना पराभव स्वीकारावा लागला होता. न्यूझीलंडने यावेळी हिशेब चुकता करत दणदणीत विजय मिळवला. आता न्यूझीलंडचा संघ दुसऱ्यांदा टी-२० वर्ल्ड कपची फायनल खेळताना दिसणार आहे.

टी-२० विश्वचषकाच्या पहिल्या उपांत्य सामन्यात न्यूझीलंडने दक्षिण आफ्रिकेचा ९ विकेट्सने पराभव करत अंतिम फेरीचं तिकीट मिळवलं. फिन अॅलनने अवघ्या ३३ चेंडूत शतक ठोकून इतिहास रचला. तो टी२० विश्वचषक इतिहासात सर्वात जलद शतक करणारा खेळाडू ठरला. विशेष म्हणजे तो नाबाद राहिलाय. या बाबतीत त्याने ख्रिस गेललाही मागे टाकले. कोलकात्यातील ईडन गार्डन्सवर खेळल्या गेलेल्या सामन्यात दक्षिण आफ्रिकेने प्रथम फलंदाजी करताना १६९ धावा केल्या होत्या. हे आव्हान न्यूझीलंडने १२.५ षटकांत फक्त एका गडी गमावत सहज पार केलं.