Suryakumar Yadav : मुंबई संघासाठी गुड न्यूज; सूर्यकुमार यादवबाबत मोठी अपडेट समोर

युवा क्रिकेटपटू यशस्वी जयस्वाल हा मुंबईचा संघ सोडून गोवा क्रिकेट संघाकडून खेळणार असल्याचं वृत्त धडकलं. त्यानं वैयक्तिक कारणांमुळं मुंबई संघ सोडून गोव्याकडून खेळण्याचा निर्णय घेतल्याचं सांगण्यात येत होते. दुसरीकडे यशस्वी जयस्वालनंतर भारतीय क्रिकेटपटू आणि मुंबई संघातील दिग्गज खेळाडू सूर्यकुमार यादव देखील मुंबईचा संघ सोडून गोव्याकडून खेळणार असल्याची चर्चा सुरू झाली होती. पण स्वतः सूर्यकुमारने या वृत्ताचं खंडन केलं.

भारताचा सलामीचा विस्फोटक फलंदाज यशस्वी जयस्वाल यानं गोव्याकडून खेळण्याची इच्छा असल्याचे मुंबई क्रिकेट संघटनेला पत्राद्वारे कळवल्याचे वृत्त आले होते. मुंबई क्रिकेट संघटनेनं त्याची विनंती मान्य केल्याचंही सांगण्यात आलं. त्याचवेळी सूर्यकुमार यादव देखील काही खेळाडूंसोबत मुंबईचा संघ सोडणार असल्याचं वृत्त येऊन धडकलं. मात्र, सूर्यकुमार यादवने हे वृत्त निराधार असल्याचे सांगितले.

आगामी रणजी ट्रॉफीसाठी सूर्यकुमार यादव गोव्याकडून खेळण्यास इच्छुक असल्याचं काही रिपोर्ट्समध्ये म्हटलं होतं. मात्र, मुंबई क्रिकेट संघटनेनं गुरुवारी या रिपोर्ट्समधील दावा खोडून काढला. यासंबंधी सूर्यकुमार यादवसोबत चर्चा केली. या वृत्तामध्ये काहीही तथ्य नाही असे सूर्यकुमार म्हणाल्याचे मुंबई क्रिकेट संघटनेने म्हटलं आहे.

मुंबई संघाकडून खेळणे माझ्यासाठी सन्मानाचं आहे. तसंच प्रतिष्ठेचंही आहे, असंही सूर्यकुमारनं सांगितल्याचं मुंबई क्रिकेट संघटनेनं पत्रकात नमूद केलं आहे.

तो दावा चुकीचाच!

अजिंक्य रहाणेच्या नेतृत्वातील मुंबईचा रणजी संघ सोडून सूर्यकुमार यादव हा गोव्याकडून खेळण्याची शक्यता असल्याचं वृत्त होतं. पण सूर्यकुमारने एक्स अकाउंटवरून स्वतःच या वृत्ताचे खंडन केले होते.

जयस्वालची कामगिरी

मुंबई रणजी संघासाठी जयस्वाल २३ ते २५ जानेवारी या दरम्यान अखेरचा सामना खेळला होता. जम्मू-काश्मीर संघाविरोधात हा सामना होता. त्यात त्याने अनुक्रमे ४ आणि २६ धावा केल्या होत्या. या सामन्यात या स्पर्धेच्या इतिहासात पहिल्यांदाच मुंबईचा जम्मू काश्मीरकडून पाच विकेटने पराभव झाला होता. दुसरीकडं गोवा क्रिकेट संघटनेचे सचिवांनी पीटीआयशी बोलताना, यशस्वीच्या निर्णयाचं स्वागत केलं होतं. जयस्वाल आमच्याकडून खेळण्यास इच्छुक आहे आणि आम्ही त्याचं स्वागत करतो. पुढच्या स्पर्धेत तो आमच्याकडून खेळणार आहे. भारतीय संघाकडून ज्यावेळी तो खेळणार नाही, त्यावेळी तो गोवा संघाचं नेतृत्व करू शकतो, असंही ते म्हणाले होते.