Cricketer dies: धक्कादायक! फलंदाजी करताना अचानक कोसळला आणि...! लाईव्ह सामन्यात क्रिकेटपटूचा मृत्यू

श्रीलंकेतील क्रिकेट विश्वाला रविवारी मोठा धक्का बसला. बेरुआलामध्ये माजी विद्यार्थ्यांच्या संघटनेतर्फे आयोजित करण्यात आलेल्या मैत्रीपूर्ण क्रिकेट सामन्यादरम्यान एका खेळाडूचा मैदानावरच मृत्यू झाला. स्थानिक माध्यमांनी दिलेल्या माहितीनुसार, मृत खेळाडूचं नाव झुल्फिकार असून तो ४५ वर्षांचा होता.

बेरुआलाच्या चायना फोर्ट परिसरातील एका प्रसिद्ध शाळेच्या माजी विद्यार्थ्यांसाठी क्रिकेट इव्हेंट्सचं आयोजन करण्यात आलं होतं. या स्पर्धेत झुल्फिकारही सहभागी झाला होता. सामना सुरू असताना तो फलंदाजी करत होता. मात्र खेळ सुरू असतानाच तो अचानक क्रीजवर कोसळला आणि मैदानावरील सर्वांनाच मोठा धक्का बसला.

हा सामना लाईव्ह सुरू असताना ही संपूर्ण घटना कॅमेऱ्यातही कैद झाली. झुल्फिकारने तीन चेंडूंमध्ये सहा रन्स केले होते. तो कोसळल्यानंतर सामना तातडीने थांबवण्यात आला. त्या वेळी ३.४ ओव्हर्समध्ये टीमचा स्कोर ३७ रन्सवर ५ बाद अशी होती.

घटना घडताच मैदानावरील खेळाडूंनी तात्काळ धाव घेत झुल्फिकारला मदत केली. त्यानंतर त्याला त्वरित बेरुआला प्रादेशिक रुग्णालयात नेण्यात आलं. मात्र रुग्णालयात पोहोचण्यापूर्वीच त्याचा मृत्यू झाल्याचं डॉक्टरांनी स्पष्ट केलं.

झुल्फिकारच्या मृत्यूचं नेमकं कारण अजून समोर आलेलं नाही. या प्रकरणाचा पुढील तपास सुरू आहे. या दुर्दैवी घटनेमुळे श्रीलंकेतील क्रिकेट वर्तुळात शोककळा पसरलीये. तसंच क्रिकेट सामने सुरू असताना खेळाडूंची आरोग्य तपासणी, आपत्कालीन वैद्यकीय सुविधा आणि त्वरित उपचारांची व्यवस्था किती महत्त्वाची आहे, याबाबत पुन्हा एकदा चर्चा सुरू झालीये.