India Tour Of Sri lanka: झिम्बाब्वेनंतर टीम इंडिया या देशाचा दौरा करणार! पाहा संपूर्ण वेळापत्रक

आयसीसी टी-२० वर्ल्डकपनंतर भारतीय संघ झिम्बाब्वे दौऱ्यावर रवाना झाला आहे. दोन्ही संघांमध्ये ५ टी-२० सामन्यांची मालिका सुरु आहे. ही मालिका झाल्यानंतर भारतीय संघ वनडे आणि टी-२० मालिकेसाठी श्रीलंका दौऱ्यावर रवाना होणार आहे. दोन्ही संघांमध्ये ३ टी-२० आणि ३ वनडे सामन्यांची मालिका रंगणार आहे. श्रीलंका क्रिकेट बोर्डने हे वेळापत्रक जाहीर केलं आहे.

भारत आणि श्रीलंका या दोन्ही संघांमध्ये होणाऱ्या टी-२० मालिकेला २६ जुलैला सुरुवात होणार आहे .मालिकेतील पहिला सामना २६ जुलै, दुसरा सामना २७ जुलै आणि मालिकेतील तिसरा सामना २९ जुलै रोजी होणार आहे. हे सर्व सामना पीआयसीएस पलेकेलेमध्ये होणार आहे. टी-२० मालिकेतील सामने संध्याकाळी ७ वाजता सुरु होतील.

टी-२० मालिका झाल्यानंतर दोन्ही संघांमध्ये ३ वनडे सामन्यांच्या मालिकेचा थरार रंगणार आहे. वनडे मालिकेतील पहिला सामना १ ऑगस्ट रोजी रंगणार आहे. तर दुसरा सामना ४ ऑगस्ट आणि तिसरा सामना ७ ऑगस्ट रोजी होणार आहे. वनडे मालिकेतील सामने दुपारी २:३० मिनिटांनी सुरु होतील. हे सामने कोलंबोच्या मैदानावर रंगणार आहेत.

कोण होणार कर्णधार?

आयसीसी टी-२० वर्ल्डकप २०२४ स्पर्धेनंतर रोहित शर्मा आणि विराट कोहलीने निवृत्तीची घोषणा केली. तर झिम्बाब्वे दौऱ्यावर गेलेल्या भारतीय संघात आयपीएल गाजवणाऱ्या खेळाडूंना संघात स्थान दिलं गेलं आहे. या मालिकेसाठी कर्णधार म्हणून शुभमन गिलची निवड करण्यात आली आहे. दरम्यान श्रीलंकेविरुद्ध होणाऱ्या टी -२० मालिकेत नेतृत्वाची जबाबदारी कोणाकडे सोपवली जाणार हे पाहणं महत्वाचं ठरणार आहे. दरम्यान वनडे मालिकेतून रोहित शर्मालाही विश्रांती दिली जाणार असल्याची चर्चा सुरु आहे. त्यामुळे रोहितच्या अनुपस्थितीत संघाचं नेतृत्व कोण करणार हे पाहणंही महत्वाचं ठरणार आहे.