IND vs WI 2nd Test Virat Kohli Century: भारत विरुद्ध वेस्टइंडीज यांच्यातील दुसरा कसोटी सामना पोर्ट ऑफ स्पेनच्या मैदानावर सुरू आहे. या सामन्याच्या दुसऱ्या दिवशी विराट कोहलीने दमदार शतक झळकावल्याचे पाहायला मिळाले आहे. हे शतक विराटच्या कसोटी कारकिर्दीतील २९ वे शतक ठरले आहे. त्याने २०६ चेंडूंचा सामना करत १२१ धावांची खेळी केली.
या खेळीदरम्यान त्याने ११ चौकार मारले. हे शतक झळकावताच अनेक दिग्गजांनी त्याच्यावर कौतुकाचा वर्षाव केला आहे. दरम्यान मास्टर ब्लास्टर सचिन तेंडुलकरने देखील स्टोरी शेअर करत त्याचे कौतुक केले आहे.
विराटसाठी सचिनची खास स्टोरी..
शतक पूर्ण करताच विराट कोहली सोशल मीडियावर ट्रेंड होऊ लागला आहे. त्याचे फॅन्स त्याच्यावर कौतुकाचा वर्षाव करताना दिसून येत आहेत. तसेच मास्टर ब्लास्टर सचिन तेंडुलकरही त्याच्या शतकी खेळीचा फॅन झाल्याचे पाहायला मिळाले आहे. (Sachin Tendulkar On Virat Kohli)
सचिनने आपल्या इंस्टाग्राम अकाऊंटवर एक स्टोरी शेअर केली आहे. ज्यात विराट कोहलीचा फोटो असल्याचे दिसून येत आहे. या फोटोला हटके कॅप्शन देत सचिनने लिहिले की, ' आणखी एक दिवस, आणखी एक शतक.. ' त्याची ही स्टोरी सध्या सोशल मीडियावर जोरदार व्हायरल होत आहे. (Latest sports updates)
भारतीय संघ मजबूत स्थितीत...
या सामन्याच्या दुसऱ्या दिवशीही भारतीय संघ मजबूत स्थितीत असल्याचे दिसून आले आहे. नाणेफेक जिंकून वेस्टइंडीजने भारतीय संघाला प्रथम फलंदाजी करण्याचे आमंत्रण दिले आहे. भारतीय संघाकडून प्रथम फलंदाजी करताना कर्णधार रोहित शर्माने ८० धावांची खेळी केली. तर यशस्वी जयस्वालने ५७ धावांचे योगदान दिले.
या दोघांनी मिळून १३९ धावांची भागीदारी केली. तसेच विराट कोहलीने १२१ धावांची खेळी केली. शेवटी रविंद्र जडेजाने ६१ आणि आर अश्विनने ५६ धावांचे योगदान दिले. भारतीय संघाचा पहिला डाव ४३८ धावांवर संपुष्टात आला.
या धावांचा पाठलाग करण्यासाठी आलेल्या वेस्टइंडीज संघाने दुसऱ्या दिवसाखेर १ गडी बाद ८६ धावा केल्या आहेत. कर्णधार ब्रेथवेट ३७ धावांवर नाबाद आहे.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.