RCB Playoffs Scenario: 'इ साला कप नामदे..' RCB ला अजूनही प्लेऑफमध्ये जाण्याची संधी! करावं लागेल हे काम

रॉयल चॅलेंजर्स बंगळुरु संघाने गुजरात टायटन्सला नमवत स्पर्धेतील चौथा विजय मिळवला आहे. या विजयानंतर रॉयल चॅलेचंर्स बंगळुरु संघाच्या प्लेऑफमध्ये जाण्याच्या आशा पुन्हा एकदा पल्लवित झाल्या आहेत. गुजरात टायटन्स संघाविरुद्ध विजय मिळवत रॉयल चॅलेंजर्स बंगळुरु संघाने ८ गुणांसह -०.०४९ नेट रनरेटसह सातव्या स्थानी झेप घेतली आहे. फाफ डू प्लेसिसच्या नेतृत्वाखाली खेळणाऱ्या रॉयल चॅलेंजर्स बंगळुरु संघाने आतापर्यंत ११ सामने खेळले आहेत. इथून हा संघ प्लेऑफमध्ये जाऊ शकतो का? जाणून घ्या कसं असेल समीकरण.

रॉयल चॅलेंजर्स बंगळुरु संघाला जर या स्पर्धेतील प्लेऑफमध्ये प्रवेश करायचा असेल, तर कुठल्याही परिस्थितीत पुढील ३ सामने जिंकावे लागतील. यासह हा संघ १४ गुणांपर्यंत पोहचू शकतो. सध्या या संघाचा नेट रनरेट -०.०४९ इतका आहे. मात्र पुढील तिन्ही सामने जिंकले, तर नेट रनरेट प्लसमध्ये येऊ शकतो.

रॉयल चॅलेंजर्स बंगळुरु संघाचे केवळ ३ सामने शिल्लक आहेत. हे तिन्ही सामने जिंकूनही या संघाला इतर संघांच्या निकालावर अवलंबून राहावं लागणार आहे. रॉयल चॅलेंजर्स बंगळुरु संघाला अशी प्रार्थना करावी लागेल की, दुसऱ्या आणि तिसऱ्या स्थानी असलेल्या हैदराबाद आणि लखनऊने १ पेक्षा जास्त सामने जिंकायला नको. असं झाल्यास रॉयल चॅलेंजर्स बंगळुरुचा प्लेऑफमध्ये जाण्याचा मार्ग मोकळा होऊ शकतो.

रॉयल चॅलेंजर्स बंगळुरुचा संघ सातव्या स्थानी आहे. तर चेन्नईचा संघ पाचव्या आणि दिल्लीचा संघ सहाव्या स्थानी आहे. रॉयल चॅलेंजर्स बंगळुरु संघाला प्रार्थना करावी लागेल की, या दोन्ही संघांनी २ सामने जिंकायला नको. असं झाल्यास चेन्नई आणि दिल्लीचे १४ गुण होतील. चेन्नईने आतापर्यंत १० पैकी ५ सामने जिंकले आहेत. तर दिल्ली कॅपिटल्स संघाने ११ पैकी ५ सामने जिंकले आहेत.