IND Vs AUS WTC 2023 Final: आयपीएल २०२३ स्पर्धेचा अंतिम सामना नुकताच पार पडला. अंतिम सामन्यात चेन्नई सुपर किंग्ज संघाने गुजरात टायटन्स संघावर जोरदार विजय मिळवला.
आता सर्वांचे लक्ष वर्ल्ड टेस्ट चॅम्पियनशिप स्पर्धेच्या अंतिम सामन्यावर असणार आहे. ७ ते ११ जून दरम्यान पार पडणाऱ्या या सामन्यात भारत आणि ऑस्ट्रेलिया हे दोन्ही संघ आमने सामने येणार आहेत. भारतीय संघाने सलग दुसऱ्यांदा या स्पर्धेच्या अंतिम फेरीत प्रवेश केला आहे.
अंतिम सामन्यासाठी विराट कोहलीसह भारतीय संघातील काही खेळाडूंनी सराव करायला सुरुवात केली आहे. तर रोहित शर्मा देखील ३० मे रोजी इंग्लंडमध्ये दाखल झाला आहे. हा सामना कर्णधार रोहित शर्मासाठी अतिशय खास असणार आहे.
रोहित शर्मा मुंबई इंडियन्स संघाला विजय मिळवून देण्यात अपयशी ठरला. मात्र आता वर्ल्ड टेस्ट चॅम्पियनशिप स्पर्धेत त्याला एक मोठा विक्रम रचण्याची संधी असणार आहे.
रोहित शर्माला इतिहास रचण्याची संधी..
रोहित शर्माने जर या सामन्यात जोरदार कामगिरी करून विजय मिळवून दिला तर त्याच्या नावे मोठ्या विक्रमाची नोंद होणार आहे. तो वर्ल्ड टेस्ट चॅम्पियनशिपची ट्रॉफी जिंकणारा पहिला भारतीय कर्णधार ठरू शकतो.
तसेच त्याला आयसीसी ट्रॉफी जिंकणाऱ्या कर्णधारांच्या यादीत प्रवेश करण्याची संधी असणार आहे. विराट कोहली आपल्या नेतृत्वाखाली भारतीय संघाला आयसीसीची एकही ट्रॉफी जिंकवू शकला नव्हता. या बाबतीत रोहित शर्मा त्याला मागे टाकू शकतो.
अंतिम सामन्यापूर्वी रोहित शर्माचा फॉर्म भारतीय संघासाठी चिंतेचा विषय ठरतोय. कारण नुकताच पार पडलेल्या आयपीएल २०२३ स्पर्धेत रोहितला हवी तशी कामगिरी करता आली नव्हती. या हंगामात त्याला अवघ्या ३३२ धावा करता आल्या आहेत. या सामन्यातही रोहित फ्लॉप ठरला तर, विराट कोहली, शुभमन गिल आणि अजिंक्य रहाणेवर त्याची जागा भरुन काढण्याची जबाबदारी असणार आहे. (Latest sports updates)
वर्ल्ड टेस्ट चॅम्पियनशिप स्पर्धेच्या अंतिम सामन्यासाठी असा आहे भारतीय संघ:
भारतीय संघ: रोहित शर्मा (कर्णधार), शुभमन गिल, चेतेश्वर पुजारा, विराट कोहली, अजिंक्य रहाणे, केएस भरत (विकेटकीपर), ईशान किशन (विकेटकीपर), आर अश्विन, रविंद्र जडेजा, अक्षर पटेल, शार्दुल ठाकुर, मोहम्मद शमी, मोहम्मद सिराज, उमेश यादव, जयदेव उनाडकट.
राखीव खेळाडू: यशस्वी जयस्वाल, मुकेश कुमार, सूर्यकुमार यादव.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.
