Rohit Sharma Record: शिष्य पडला 'गुरु'वर भारी! मोठ्या रेकॉर्डमध्ये रोहित शर्माने राहुल द्रविडलाही सोडलं मागे

भारत आणि श्रीलंका या दोन्ही संघांमध्ये वनडे मालिकेचा थरार सुरु आहे. या मालिकेतील दुसरा सामना कोलंबोतील प्रेमदासाा स्टेडियमवर सुरु आहे. या सामन्यात भारताचा कर्णधार रोहित शर्माने मोठा कारनामा करुन दाखवला आहे. या सामन्यात धावांचा पाठलाग करताना २ धावा करताच त्याने राहुल द्रविडचा मोठा रेकॉर्ड मोडून काढला आहे.

रोहितने राहुल द्रविडला सोडलं मागे

ही मालिका सुरु होताच रोहित शर्माला राहु द्रविडचा मोठा रेकॉर्ड मोडून काढण्याची संधी होती. वनडे क्रिकेटमध्ये सर्वाधिक धावा करणाऱ्या भारतीय फलंदाजांच्या यादीत राहुल द्रविडला मागे सोडण्यासाठी रोहितला अवघ्या ६० धावांची गरज होती. हा रेकॉर्ड पहिल्याच वनडे सामन्यात मोडला गेला असता. मात्र पहिल्या वनडेत तो हा ५८ धावांवर माघारी परतला. त्यामुळे हा रेकॉर्ड २ धावांनी थोडक्यात बचावला. दरम्यान दुसऱ्या सामन्यात त्याने सर्वाधिक धावा करण्याच्या रेकॉर्डमध्ये राहुल द्रविडला मागे सोडलं आहे.

राहुल द्रविडने वनडे क्रिकेटमध्ये १०७६८ धावा केल्या आहेत. रोहित शर्माने या सामन्यात फलंदाजीला येण्यापूर्वी १०७६६ धावा केल्या होत्या. त्यामुळे राहुल द्रविडला मागे सोडण्यासाठी त्याला अवघ्या २ धावा करायच्या होत्या. दरम्यान भारताचा माजी फलंदाज सचिन तेंडुलकर या यादीत अव्वल स्थानी आहे. सचिनने वनडे क्रिकेटमध्ये १८४२६ धावा केल्या आहेत.

पहिल्या वनडेत अर्धशतक

आयसीसी टी-२० वर्ल्डकप २०२४ स्पर्धा झाल्यानंतर रोहित शर्माने टी-२० आंतरराष्ट्रीय क्रिकेटला रामराम करण्याचा निर्णय घेतला आहे. त्यामुळे तो केवळ वनडे आणि कसोटी क्रिकेट खेळताना दिसून येणार आहे. वनडे वर्ल्डकप २०२३ स्पर्धा झाल्यानंतर तो पहिल्यांदाच वनडे क्रिकेट खेळण्यासाठी मैदानात उतरला. पहिल्याच सामन्यात त्याने ५८ धावांची शानदार खेळी केली. मात्र त्याला या खेळीचं मोठ्या खेळीत रुपांतर करता आलं नाही.