Rohit Sharma Fitness : रोहित शर्मा वनडे मालिका खेळणार का? फिटनेसबाबत मोठी अपडेट

भारत आणि अफगाणिस्तान (India Vs Afghanistan) यांच्यातील एकमेव कसोटी सामना अवघ्या अडीच दिवसांतच संपला. भारतानं एक डाव राखून ऐतिहासिक विजय मिळवला. आता दोन्ही संघांमध्ये वनडे मालिका होणार आहे. १३ जूनपासून मालिकेला सुरुवात होईल. त्याआधीच रोहित शर्माच्या फिटनेसबाबत महत्वाची अपडेट आली आहे. रोहित शर्मा वनडे मालिकेत खेळणार का? तो फिट आहे का? या सर्व प्रश्नार्थक चर्चांना पूर्णविराम मिळाला आहे.

अफगाणिस्तानविरुद्धच्या वनडे मालिकेसाठी (ODI series) निवडलेल्या संघात माजी कर्णधार रोहित शर्मा (Rohit Sharma) याला स्थान देण्यात आले होते. मात्र, तो खेळणार की नाही हे फिटनेसवर अवलंबून होते. विराट कोहलीनंतर रोहितही मैदानात खेळताना दिसणार नाही अशी चर्चा सुरू झाली होती. या चर्चेला आता पूर्णविराम मिळाला आहे. रोहितच्या फिटनेसबाबत महत्वाची माहिती समोर आली आहे.

बेंगळुरू येथील बीसीसीआयच्या सेंटर ऑफ एक्सीलेन्समध्ये रोहित शर्मा फिटनेसच्या कसोटीवर खरा उतरला आहे. तो पूर्णपणे फिट असल्यानं अफगाणिस्तानविरुद्धच्या वनडे मालिकेत खेळण्याचा त्याचा मार्ग मोकळा झाला आहे. तत्पूर्वी, अधिकृत क्लीअरन्स मिळण्यासाठी एका दिवसाचा अवधी लागू शकतो, असं सांगितलं जातं. सूत्रांनी पीटीआयला दिलेल्या माहितीनुसार, रोहित शर्मा हॅमस्ट्रिंगच्या दुखापतीमुळं सीओईमध्ये होता. तपासणीनंतर त्याला खेळण्याची परवानगी मिळाली आहे. रोहित शर्मा लवकरच संघ सहकाऱ्यांसोबत सरावाला जाईल, अशी शक्यता व्यक्त केली जात आहे. रोहितसोबत हार्दिक पंड्याही वनडे मालिकेत खेळताना दिसणार आहे.

रोहित शर्मा हा आयपीएल २०२६ मध्ये जायबंदी झाला होता. त्यामुळे मुंबई इंडियन्सकडून तो ५ सामने खेळू शकला नव्हता. त्यानं कमबॅक केलं, पण एकाच सामन्यात त्याला मोठी खेळी साकारता आली. आयपीएल पर्वाच्या अखेरच्या सामन्यात तर त्याला भोपळाही फोडता आला नव्हता. आता जवळपास तीन आठवड्यांनी तो मैदानावर दिसणार आहे. भारत-अफगाणिस्तान यांच्यातील वनडे मालिकेतील पहिला सामना धर्मशालामध्ये होणार आहे.

अफगाणिस्तानविरुद्ध भारतीय संघ -

शुभमन गिल (कर्णधार), रोहित शर्मा, यशस्वी जयस्वाल, श्रेयस अय्यर, केएल राहुल, ईशान किशन, हार्दिक पंड्या, नीतीश कुमार रेड्डी, वॉशिंग्टन सुंदर, कुलदीप यादव, अर्शदीप सिंग, प्रसिद्ध कृष्णा, प्रिन्स यादव, गुरनूर बरार, हर्ष दुबे.