IND Vs AUS: रवींद्र जडेजा कसोटीत रचणार इतिहास! हा मोठा विक्रम नावावर करत वर्ल्ड क्रिकेटला हादरवून सोडणार

ICC Ranking: भारत विरुध्द ऑस्ट्रेलिया या दोन्ही संघांमध्ये ४ कसोटी सामन्यांची मालिका सुरु आहे. या मालिकेतील पहिल्या २ सामन्यांमध्ये भारतीय संघाने जोरदार कामगिरी करत २-० ची आघाडी घेतली आहे.

आता उर्वरित कसोटी सामने इंदोर आणि अहमदाबादच्या मैदानावर पार पडणार आहे. या सामन्यापूर्वीच भारतीय संघाचा अष्टपैलू खेळाडू रवींद्र जडेजा एक मोठा विक्रम आपल्या नावावर करणार आहे. (Latest Sports Updates)

आज आयसीसीची रॅकिंग जाहीर केली जाणार आहे. अशी शक्यता व्यक्त केली जात आहे की, रवींद्र जडेजा (Ravindra jadeja) आपलाच एक मोठा विक्रम मोडून काढू शकतो. ऑस्ट्रेलियाविरुध्दच्या पहिल्या २ कसोटी सामन्यांमध्ये जोरदार कामगिरी करणारा रवींद्र जडेजा सध्या अष्टपैलू खेळाडूंच्या यादीत अव्वल स्थानी आहे. त्याची कामगिरी पाहता हे तर नक्की आहे की, तो नंबर १ स्थानी कायम राहणार आहे.

जडेजाचे रेटिंग पॉईंट्स ४२४ आहेत. या दमदार कामगिरीचा त्याला मोठा फायदा होणार आहे. त्यामुळे रँकिंगमध्ये तो मोठी उसळी घेऊ शकतो. त्याची आतापर्यंतची सर्वोत्तम रेटिंग ४३८ आहे. यावेळी तो स्वतःचाच रेकॉर्ड मोडत आणखी मोठा रेकॉर्ड प्रस्थापित करू शकतो.

ऑस्ट्रेलियाविरुध्द सुरू असलेल्या मालिकेत त्याच्या फलंदाजी आणि गोलंदाजीची जादू पाहायला मिळत आहे. या मालिकेतील २ सामन्यांमध्ये त्याने आतापर्यंत एकूण १७ गडी बाद केले आहेत. नागपुर कसोटीत त्याने ७ तर दिल्ली कसोटीत त्याने १० गडी बाद केले होते.