World Cup 2023: नेदरलँडच्या विजयाने पॉईंट्स टेबलमध्ये मोठा बदल; टीम इंडियाचा फायदा, दक्षिण आफ्रिकेचं नुकसान

ICC World Cup 2023 Points Table

वनडे वर्ल्डकप स्पर्धेत मंगळवारी दुसरा मोठा उलटफेर पाहायला मिळाला. स्पर्धेत दुबळ्या मानल्या जाणाऱ्या नेदरलँड संघाने बलाढ्य अशा दक्षिण आफ्रिकेचा ३९ धावांनी दारुण पराभव केला. या पराभवामुळे क्रीडा जगतात एकच खळबळ उडाली आहे. दरम्यान, नेदरलँडच्या या विजयाचा गुणतालिकेत मोठा उलटफेर झाला असून टीम इंडियाला जबरदस्त फायदा झाला आहे. दुसरीकडे दक्षिण आफ्रिकेचं मोठं नुकसान झालं आहे. (Latest sports updates)

पावसामुळे उशीरा सुरू झालेल्या या सामन्यात दक्षिण आफ्रिकेचा कर्णधार तेंबा बमुआने प्रथम नाणेफेक जिंकून गोलंदाजीचा निर्णय घेतला होता. त्याचा हा निर्णय आफ्रिकेच्या चांगलाच अंगलट आला. नेदरलँडने धुव्वाधार फलंदाजी (Sport News) करत ४३ षटकात ८ बाद २४५ धावांपर्यंत मजल मारली.

२४६ धावांच्या आव्हानाचा पाठलाग करताना दक्षिण आफ्रिकेची सुरुवात अतिशय खराब झाली. भन्नाट फॉर्ममध्ये असलेला क्विंटन डी कॉक २० धावा काढून माघारी परतला. त्यापाठोपाठ तेंबा बमुआ देखील बाद झाला. डेव्हिड मिलर आणि केशव महाराजने चांगली खेळी केली.

मात्र, ठराविक अंतराने विकेट्स गमावल्यामुळे दक्षिण आफ्रिकेचा डाव गडगडला आणि संपूर्ण संघ अवघ्या २०७ धावांवर बाद झाला. २००७ नंतर नेदरलँडचा वनडे विश्वचषकातील हा पहिलाच विजय ठरला. त्यांच्या या विजयाने सर्वांनाच चक्रावून टाकलं. यापूर्वी २०२२ मध्ये सुद्धा नेदलँडने टी-२० विश्वचषकात आफ्रिकेचा पराभव केला होता.

नेदरलँडच्या विजयाचा टीम इंडियाला मोठा फायदा

दरम्यान, नेदरलँडने दक्षिण आफ्रिकेचा पराभव केल्यानंतर टीम इंडियाला (Team India) गुणतालिकेत मोठा फायदा झाला आहे. टीम इंडियाचं गुणतालिकेत अव्वल स्थान कायम आहे. जर दक्षिण आफ्रिकेने हा सामना जिंकला असता, ते अव्वल स्थानावर पोहचले असते. टीम इंडियाची दुसऱ्या क्रमांकावर घसरण झाली असती.

मात्र, दक्षिण आफ्रिकेच्या पराभवामुळे गुणतालिकेत मोठा बदल झाल्याचं पाहायला मिळालं आहे. दरम्यान, नेदरलँडला देखील या विजयाचा फायदा झाला आहे. या सामन्याआधी नेदरलँडचा संघ गुणतालिकेत दहाव्या क्रमांकावर होता. आता तो नवव्या क्रमांकावर पोहचला असून श्रीलंका संघाची दहाव्या स्थानावर घसरण झाली आहे.