Mirabai Chanu: वर्ल्ड चॅम्पियनशिपमध्ये मीराबाई चानूने रचला इतिहास; 199 किलो वजन उचलून पटकावलं सिल्वर मेडल

भारताची स्टार वेटलिफ्टर मीराबाई चानू हिने नॉर्वेमधील फोर्डेमध्ये सुरू असलेल्या जागतिक वेटलिफ्टिंग स्पर्धेत सिल्वर मेडल जिंकून पुन्हा एकदा इतिहास रचला आहे. ही स्पर्धा मीराबाईसाठी विशेष ठरली कारण जागतिक स्पर्धेच्या इतिहासातील हे तिचं तिसरं पदक आहे. यासह ती भारतासाठी सर्वाधिक विश्वचषक पदकं जिंकणारी तिसरी महिला वेटलिफ्टर ठरली आहे.

मीराबाईने यापूर्वी २०१७ मध्ये अमेरिकेतील Anaheim मध्ये झालेल्या जागतिक स्पर्धेत ४८ किलो वजनाच्या गटात गोल्ड मेडल पटकावलं होतं. २०२२ मध्ये कोलंबियातील बोगोटामध्ये झालेल्या स्पर्धेत तिने ४९ किलो गटात रौप्यपदक जिंकलं होतं.

चीनच्या खेळाडूशी जबरदस्त चुरस

या स्पर्धेत मीराबाई चानूने ४८ किलो वजनी गटात एकूण १९९ किलो वजन उचलत दुसरं स्थान मिळवलंय. स्नॅच राऊंडमध्ये तिने ८४ किलो आणि क्लीन अँड जर्कमध्ये ११५ किलो वजन उचललं. उत्तर कोरियाच्या री सांग गुम हिने एकूण २१३ किलो वजन उचलत सुवर्णपदक पटकावलं. चीनच्या थान्याथनसोबत मीराबाईची चुरस पाहायला मिळाली.

या स्पर्धेत थान्याथनने ब्रॉन्स मेडल जिंकलं. स्नॅच राऊंडमध्ये ती मीराबाईपेक्षा ४ किलोने आघाडीवर होती. मात्र क्लीन अँड जर्कमध्ये मीराबाईने अप्रतिम कामगिरी करत थान्याथनला मागे टाकले आणि १ किलोच्या फरकाने सिल्वर मेडल आपल्या नावावर केलं. तिच्या या विजयानंतर प्रेक्षकांनी एकच जल्लोष केला.

कोचला दिलं विजयानंतर श्रेय

पदक जिंकल्यानंतर मीराबाई थेट आपल्या कोच विजय शर्मा यांच्या जवळ गेली आणि त्यांचे आभार मानले. गेल्या काही वर्षांत दुखापतींमुळे तिच्यासाठी काळ कठीण गेला होता. मात्र तिने चिकाटी आणि मेहनतीच्या जोरावर कमबॅक करत याच वर्षी अहमदाबादमध्ये झालेल्या कॉमनवेल्थ चॅम्पियनशिपमध्ये सुवर्णपदक जिंकलं होतं.

इतिहासात नाव कोरले

मीराबाई चानू ही भारतासाठी जागतिक स्पर्धेत दोनहून अधिक वेळा पदक जिंकणारी तिसरी खेळाडू ठरलीये. तिच्याआधी कुंजरानी देवी आणि कर्णम मल्लेश्वरी यांनी ही कामगिरी केली होती. कुंजरानी देवीने १९८९ ते १९९७ दरम्यान तब्बल सात वेळा सिल्वर मेडल जिंकलं. तर कर्णम मल्लेश्वरीने १९९४ आणि १९९५ मध्ये गोल्ड मेडल तसंच १९९३ आणि १९९६ मध्ये ब्रॉन्स मिळवत एकूण चार पदकांची कमाई केली होती.