IND vs WI 1st Test Result: अश्विनच्या फिरकीसमोर विंडीजचा संघ गारद! पहिल्या कसोटीत टीम इंडियाचा 1 डाव अन् 141 धावांनी विजय

IND vs WI 1st Test Highlights: भारत विरूद्ध वेस्टइंडीज यांच्यातील २ कसोटी सामन्यांच्या मालिकेतील पहिला सामना डॉमिनिकाच्या मैदानावर पार पडला. या सामन्यात भारतीय संघाने १ डाव आणि १४१ धावांनी विजय मिळवला आहे. (IND vs WI 1st Test Match Result)

यासह कसोटी मालिकेत १-० ची आघाडी घेतली आहे. या सामन्यात भारतीय संघातील फलंदाज आणि गोलंदाजांकडून दमदार कामगिरी केल्याचे पाहायला मिळाले आहे. भारतीय संघाने पहिल्या डावात ४२१ धावा करत डाव घोषित केला. प्रत्युत्तरात वेस्टइंडीजचा डाव अवघ्या १३० धावांवर संपुष्टात आला. भारतीय संघाकडून आर अश्विनने सर्वाधिक ७ गडी बाद केले.

या सामन्यात वेस्टइंडीज नाणेफेक जिंकून प्रथम फलंदाजी करण्याचा निर्णय घेतला होता. प्रथम फलंदाजी करताना वेस्ट इंडीजचा डाव अवघ्या १५० धावांवर संपुष्टात आला होता. या डावात आर अश्विनने सर्वाधिक ५ गडी बाद केले होते. त्यानंतर फलंदाजीला आलेल्या भारतीय संघाकडून रोहित शर्मा आणि यशस्वी जयस्वालने जोरदार शतकी खेळी करत भारतीय संघाला दमदार सुरुवात करून दिली.

रोहित शर्मा आणि यशस्वी जयस्वाल यांनी २२९ धावांची भागीदारी केली. रोहित १०३ तर यशस्वी जयस्वाल १७१ धावांची खेळी करत माघारी परतला. तर विराट कोहलीने ७६ धावांचे योगदान दिले. भारतीय संघाने पहिला डाव ४२१ धावांवर घोषित केला. यासह २७१ धावांची आघाडी घेतली. (Latest sports updates)

आर अश्विनची दमदार गोलंदाजी..

सामन्याच्या तिसऱ्या दिवसातील दुसरे सत्र सुरू झाल्यानंतर ५० षटकांचा खेळ शिल्लक होता. इथून आर अश्विनने वेस्टइंडीजच्या फलंदाजांना आपल्या जाळ्यात अडकवायला सुरुवात केली. अवघ्या ५८ धावसंख्येवर वेस्टइंडीजचा अर्धा संघ तंबूत परतला होता.

या डावात अश्विनने ७ गडी बाद केले. तर दोन्ही डावात मिळून त्याने १२ गडी बाद केले. दरम्यान १७१ धावांची खेळी करणारा यशस्वी जयस्वाल सामन्याचा हिरो ठरला.