IPL 2025 Mega Auction: मुंबईकर रिकाम्या हातीच परतले! रहाणेसह 2 स्टार खेळाडू अन्सोल्ड

आयपीएल मेगा लिलावाचा थरार सौदी अरेबियातील जेद्दाहमध्ये सुरु आहे. या लिलावातील पहिल्या दिवशी स्टार खेळाडूंवर रेकॉर्डब्रेक बोली लागली. दुसऱ्या दिवसाच्या लिलावाला सुरुवात झाली आहे. दुसऱ्या दिवशी पहिल्याच सेटमध्ये मुंबईकर खेळाडूंना धक्का बसला आहे.

मुंबईचे ३ स्टार खेळाडू अन्सोल्ड

लिलावातील दुसऱ्या दिवशी अजिंक्य रहणेचं नाव आलं. अजिंक्य रहाणेची बेस प्राईज १.५० कोटी रुपये होती. मात्र कुठल्याही संघाने त्याला खरेदी करण्यात रस दाखवलेला नाही. गेल्या हंगामात तो चेन्नई सुपर किंग्ज संघाकडून खेळताना दिसून आला होता. मात्र या लिलावात कुठल्याही संघाने त्याच्यावर बोली लावलेली नाही.

पृथ्वी शॉ अन्सोल्ड

आयपीएल स्पर्धेत दिल्ली कॅपिटल्सकडून पदार्पण करणाऱ्या पृथ्वी शॉला दिल्लीने आगामी हंगामापूर्वी रिलीज करण्याचा निर्णय घेतला होता. आपल्या आक्रमक फलंदाजीसाठी ओळखला जाणारा पृथ्वी शॉ गेल्या हंगामात पूर्णपणे फ्लॉप ठरला होता. त्याची ही फ्लॉप कामगिरी पाहता कुठल्याही संघाने त्याच्यावर बोली लावलेली नाही. त्याने आपली बेस प्राईज ७५ लाख रुपये ठेवली होती. मात्र तरीही त्याला खरेदीदार मिळालेला नाही .

शार्दुल ठाकुर

गेल्या हंगामात चेन्नई सुपर किंग्जकडून खेळणाऱ्या शार्दुल ठाकुरला या हंगामात कुठल्याही संघाने बोली लावलेली नाही. गेल्या हंगामात तो दुखापतग्रस्त झाला होता. यासह काही महिन्यांपासून तो आंतरराष्ट्रीय क्रिकेटही खेळताना दिसून आलेला नाही. त्यामुळे कुठल्याही संघाने त्याच्यावर बोली लावण्यात रस दाखवलेला नाही.

न्यूझीलंडचे दिग्गज खेळाडू अन्सोल्ड

भारताचे हे स्टार खेळाडू अन्सोल्ड झालेच, यासह न्यूझीलंडच्या खेळाडूंनाही संघांनी खरेदी करण्यात रस दाखवलेला नाही. संघाचा कर्णधार केन विलियन्सनवर कुठल्याही संघाने बोली लावलेली नाही. यासह ग्लेन फिलिप्सही अन्सोल्ड राहिला आहे .