Asia Cup 2024, IND V NEP: टेबल टॉपर टीम इंडिया नेपाळसोबत भिडणार! अशी असू शकते दोन्ही संघांची प्लेइंग 11

श्रीलंकेत महिला आशिया चषक २०२४ स्पर्धेचा थरार सुरु आहे. या स्पर्धेत भारतीय महिला संघाने आतापर्यंत शानदार कामगिरी केली आहे. भारतीय संघाला सेमिफायनलमध्ये जाण्यासाठी प्रबळ दावेदार मानलं जात आहे. पाकिस्तान आणि युएईसोबत झालेल्या सामन्यात भारतीय संघाने शानदार विजय मिळवला. आज भारतीय संघाचा सामना नेपाळविरुद्ध होणार आहे. हा सामना दांबुलातील रंगिरी दांबुला आंतरराष्ट्रीय क्रिकेट स्टेडियममध्ये रंगणार आहे. दरम्यान या सामन्यासाठी कशी असेल दोन्ही संघांची प्लेइंग ११? जाणून घ्या.

हरमनप्रीत कौरच्या नेतृत्वाखाली खेळत असलेल्या भारतीय संघाने आतापर्यंत २ सामने खेळले आहेत आणि दोन्ही सामन्यांमध्ये विजय मिळवला आहे. पहिल्या सामन्यात भारतीय संघाने पाकिस्तानवर ७ गडी राखून विजय मिळवला होता. तर दुसऱ्या सामन्यात भारतीय संघाचा सामना युएईसोबत पार पडला. या सामन्यातही भारतीय खेळाडू चमकले आणि युएईवर ७८ धावांनी एकतर्फी विजय मिळवला.

नेपाळच्या कामगिरीबद्दल बोलायचं झालं, तर नेपाळने युएईवर ६ गडी राखून विजय मिळवला होता. तर दुसऱ्या सामन्यात या संघाला पाकिस्तानकडून ९ गडी राखून पराभवाचा सामना करावा लागला होता.

सेमिफायनलमध्ये जाण्याची संधी

भारतीय संघ सध्या गुणतालिकेत अव्वल स्थानी आहे. आतापर्यंत खेळलेल्या दोन्ही सामन्यांमध्ये भारतीय संघाने विजय मिळवत ४ गुणांसह अव्वल स्थान गाठलं आहे. तर २ पैकी १ सामना जिंकून नेपाळचा संघ गुणतालिकेत तिसऱ्या स्थानी आहे. दोन्ही सामन्यांमध्ये शानदार कामगिरी केल्यानंतर तिसऱ्या सामन्यासाठी भारतीय संघाच्या प्लेइंग ११ मध्ये बदल होण्याची शक्यता खूप कमी आहे.

या सामन्यासाठी असू शकते दोन्ही संघांची प्लेइंग ११:

भारतीय महिला क्रिकेट संघ: ऋचा घोष (यष्टीरक्षक), स्‍मृति मंधाना, जेमिमा रॉड्रिग्स, डी हेमलता, शेफाली वर्मा, हरमनप्रीत कौर (कर्णधार), दीप्ति शर्मा, पूजा वस्त्राकर, रेणुका सिंग, राधा यादव, तनुजा कंवर.

नेपाल महिला क्रिकेट संघ: काजल श्रेष्ठ (यष्टीरक्षक), बिंदू रावल, समझ खड़का, रोमा थापा, पूजा महतो, रूबीना छेत्री, इंदु बर्मा (कर्णधार), कबिता जोशी, सीता राणा मगर, कृतिका मरासिनी, कबिता कुंवर