India vs Bangladesh 2nd T2OI Live Score: दिल्लीतील अरुण जेटली स्टेडियमवर भारत आणि बांगलादेश या दोन्ही संघांमध्ये ३ टी-२० सामन्यांच्या मालिकेतील दुसरा सामना सुरु आहे. या सामन्यात प्रथम फलंदाजी करताना, भारतीय संघाकडून नितीश कुमार रेड्डी, रिंकू सिंग आणि हार्दिक पंड्याची वादळी फलंदाजी पाहायला मिळाली आहे. या फलंदाजांच्या आक्रमक फलंदाजीच्या बळावर भारतीय संघाने २० षटकअखेर २२१ धावांपर्यंत मजल मारली आहे.
या सामन्यात बांगलादेशचा कर्णधार शांतोने नाणेफेक जिंकून प्रथम गोलंदाजी करण्याचा निर्णय घेतला. सुरुवातीला बांगलादेशच्या गोलंदाजांनी हा निर्णय योग्य ठरवला. भारताला सुरुवातीला मोठे धक्के बसले. मात्र त्यानंतर भारताच्या फलंदाजांनी बांगलादेशच्या गोलंदाजांचा चांगलाच समाचार घेतला. भारतीय संघाकडून फलंदाजी करताना नितीश कुमार रेड्डी, रिंकू सिंग आणि हार्दिक पंड्या यांनी तुफान फटकेबाजी केली.
आपला दुसराच टी-२० सामना खेळत असलेल्या नितीश कुमार रेड्डीने बांगलादेशच्या गोलंदाजांचा चांगलाच समाचार घेतला. त्याने षटकारांचा पाऊस पाडत, २७ चेंडूत आपलं अर्धशतक पूर्ण केलं. त्यानंतरही त्याने आपली आक्रमक फलंदाजी सुरुच ठेवली. शतक झळकावण्याची संधी असताना, तो ७४ धावांवर माघारी परतला.
रेड्डी बाद झाल्यानंतर रिंकू सिंगने जबाबदारी स्विकारली. त्याने २९ चेंडूत ५३ धावांची शानदार खेळी केली. त्यानंतर शेवटी हार्दिक पंड्याने ३२ धावांची विस्फोटक खेळी केली. या खेळीच्या बळावर भारतीय संघाने २० षटकअखेर २२१ धावा केल्या.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.