IND vs AFG: शिवम सुंदरम् ... ! दुबेच्या अष्टपैलू खेळीनं टीम इंडियानं अफगाणिस्तानला केलं चारीमुंड्या चीत

India vs Afghanistan 1st Match Result:

शिवम दुबेच्या (Shivam Dube) अर्धशतकी खेळीच्या आणि रिंकू सिंगच्या (Rinku Singh) फिनिशिंग टचच्या बळावर भारतीय संघाने मोहालीचं मैदान मारलंय. भारत आणि अफगाणिस्तान या दोन्ही संघांमध्ये ३ टी -२० सामन्यांच्या मालिकेला प्रारंभ झाला आहे. (India vs Afghanistan Match Highlights)

मालिकेतील पहिला सामना मोहालीच्या मैदानावर पार पडला. या सामन्यात भारतीय संघाला विजयासाठी १५९ धावांची गरज होती. या धावांचा पाठलाग करताना भारतीय संघाने ६ गडी राखून विजय मिळवला आहे. यासह टी -२० मालिकेत १-० ची आघाडी घातली आहे.

विजयासाठी १५९ धावांचं आव्हान..

या सामन्यात भारतीय संघाचा कर्णधार रोहित शर्माने नाणेफेक जिंकली आणि प्रथम गोलंदाजी करण्याचा निर्णय घेतला. अफगाणिस्तानकडून फलंदाजी करताना नबीने सर्वाधिक ४२ धावा केल्या. तर ओमरजाईने २९ आणि कर्णधार जदरानने २५ धावा केल्या. या खेळीच्या जोरावर अफगाणिस्तानने २० षटक अखेर ५ गडी बाद १५८ धावा केल्या. भारतीय संघाकडून गोलंदाजी करताना मुकेश कुमार आणि अक्षर पटेलने प्रत्येकी २-२ गडी बाद केले. तर शिवम दुबेने १ गडी बाद केला. (Latest sports updates)

भारतीय संघाला हा सामना जिंकण्यासाठी १५९ धावा करायच्या होत्या. या धावांचा पाठलाग करताना भारतीय संघाला हवी तशी सुरुवात करता आली नाही. कारण रोहित शर्मा आणि शुभमन गिल यांच्यात ताळमेळ पाहायला मिळाला नाही. त्यामुळे रोहित शून्यावर बाद होऊन माघारी परतला. तर गिलने २३ आणि तिलक वर्माने २६ धावा केल्या. त्यानंतर जितेश शर्माने ३१ धावांचे बहुमूल्य योगदान दिले. शेवटी शिवम दुबेने नाबाद ६० धावांची खेळी करत भारतीय संघाला विजय मिळवून दिला.