Ind Vs Eng : कॅप्टन गिलचं खणखणीत शतकं अन् भारताचा डाव ३०० पार, सामन्याच्या पहिल्या दिवशी काय-काय घडलं?

India Vs England कसोटी मालिकेतील दुसऱ्या कसोटी सामन्याला काल (२ जुलै) बर्मिंगहॅममधील एजबॅस्टन स्टेडियमवर सुरुवात झाली. मालिकेतील पहिला सामना लीड्समध्ये खेळला गेला होता. या सामन्यामध्ये इंग्लंडने भारतावर ५ विकेट्सनी विजय मिळवला. पहिला सामना गमावल्यानंतर दुसऱ्या सामन्यात कमबॅक करण्यासाठी भारतीय संघाने तयारी केली.

एजबॅस्टनच्या मैदानावर काल सामन्याला सुरुवात झाली. सामन्यापूर्वी इंग्लंडचे माजी क्रिकेटपटू वेन लार्किन यांना श्रद्धांजली वाहण्यात आली. २८ जून रोजी त्यांचे निधन झाले होते. इंग्लंडचा कर्णधार बेन स्टोक्सने टॉस जिंकला आणि प्रथम गोलंदाजी करणार असल्याचे सांगितले. त्याने भारताला प्रथम फलंदाजी करण्याचे आमंत्रण दिले. त्यानुसार यशस्वी जैस्वाल आणि केएल राहुल ही सलामीची जोडी मैदानात उतरली.

सामन्याच्या सुरुवातीलाच इंग्लंडने केएल राहुलच्या रुपात धक्का दिला. राहुल फक्त २ धावांवर बाद झाला. ख्रिस वोक्सच्या चेंडूवर अनलकी ठरत राहुल माघारी परतला. त्याच्यापाठोपाठ आलेल्या करुण नायरने ३१ धावा केल्या. चुकीचा शॉट खेळून करुण नायरची विकेट पडली. त्यानंतर शुभमन गिल आणि यशस्वी जैस्वाल यांनी खेळ सावरला.

यशस्वी जैस्वालचे शतक अवघ्या १३ धावांनी हुकले. एकूणच पहिल्या दिवसात त्याने उत्कृष्ट फलंदाजी केली. ८७ धावा करुन तो तंबूत परतला. यशस्वी जैस्वालनंतर रिषभ पंतकडे सर्वांचे लक्ष लागले होते. पण रिषभ पंत इंग्लंडच्या जाळ्यात अडकला. २५ धावांवर तो कॅचआउट झाला. पहिल्या सामन्यात पंतसाठी जी रणनीती इंग्लंडने वापरली होती, त्याच रणनीतीने दुसऱ्या सामन्यातही इंग्लंडला रिषभ पंतची विकेट मिळाली.

भारताने शेवटच्या फळीसाठी खास नितीश कुमार रेड्डीला संघात सामील केले होते. पण त्याने निराशा केली. तो १ धाव करुन बाद झाला. त्यानंतर अनुभवी रवींद्र जडेजा आणि कॅप्टन शुभमन गिल यांनी भारताचा डाव पुढे नेला. संयमी पद्धतीने खेळत तिसऱ्या सत्रापर्यत दोघांनी भारताची धावसंख्या ३०० पार नेली. शेवटच्या सत्रामध्ये शुभमन गिलने नाबाद शतकीय कामगिरी केली. जडेजा देखील अर्धशतकाच्या जवळ आहे. दुसऱ्या दिवशी दोघे टिकून खेळत भारताची धावसंख्या पुढे नेतील असा विश्वास चाहत्यांना आहे.

इंग्लंडकडून ख्रिस वोक्सने सर्वाधिक २ विकेट्स घेतल्या आहेत. त्याच्यापाठोपाठ इंग्लंडचा कर्णधार बेन स्टोक्स, शोएब बशीर आणि ब्रेडन कार्स यांनी प्रत्येकी १-१-१ गडी बाद केले आहेत. ख्रिस वोक्सने पहिल्या दिवसामध्ये सर्वाधिक चांगली कामगिरी केली आहे. जोश टंगला अद्याप एकही विकेट मिळालेली नाही.