GT vs CSK,IPL 2024: गुजरातसाठी 'करो या मरो' लढत! GT vs CSK सामन्यात खेळपट्टी कोणाला देणार साथ? कसं असेल हवामान?

अहमहाबादच्या नरेंद्र मोदी स्टेडियमवर आज गुजरात टायटन्स आणि चेन्नई सुपर किंग्ज हे दोन्ही संघ आमने सामने येणार आहेत. शुभमन गिलच्या नेतृत्वाखाली खेळणाऱ्या गुजरात टायटन्सने ११ पैकी ४ सामने जिंकले आहेत. ८ गुणांसह हा संघ गुणतालिकेत सर्वात शेवटी आहे. तर ११ पैकी ६ सामने जिंकून १२ गुणांसह चेन्नई सुपर किंग्जचा संघ गुणतालिकेत चौथ्या स्थानी आहे. दरम्यान या सामन्यापूर्वी जाणून घ्या कशी असेल खेळपट्टी? आणि काय सांगतो हवामानाचा अंदाज.

चेन्नई सुपर किंग्ज संघाला प्लेऑफमध्ये जाण्यासाठी प्रबळ दावेदार मानलं जात आहे. चेन्नईने आतापर्यंत १२ गुणांची कमाई केली आहे. प्लेऑफमध्ये स्थान मिळवण्यासाठी चेन्नईला २ सामने जिंकायचे आहेत. तर दुसरीकडे गुजरातचा संघ संघर्ष करताना दिसून आला आहे. आज होणाऱ्या सामन्यात गुजरातचा संघ पराभूत झाल्यास प्लेऑफचा प्रवास थांबणार आहे.

खेळपट्टी कोणाला देणार साथ?

अहमदाबादच्या मैदानावरील खेळपट्टी ही स्लो आहे. त्यामुळे पहिल्या डावात गोलंदाजांना मदत मिळते. तर सामना जसजसा पुढे जातो, ही खेळपट्टी फलंदाजांना फलंदाजी करण्यासाठी सोपी होत जाते. त्यामुळेच धावांचा पाठलाग करणं या मैदानावर सोपं होऊन जातं. हा रेकॉर्ड पाहता नाणेफेक जिंकणारा प्रथम गोलंदाजी करण्याचा निर्णय घेऊ शकतो.

कसं असेल हवामान?

हा सामना संध्याकाळी ७:३० वाजता होणार आहे. या सामन्यावेळी तापमान ३९ डिग्री सेल्सिअसच्या आसपास असेल. तर ताशी १३ किमी इतक्या वेगाने वारे वाहतील. चाहत्यांसाठी आनंदाची बाब म्हणजे, या सामन्यावेळी पाऊस पडणार नाहीये. त्यामुळे क्रिकेट चाहत्यांना २०-२० षटकांचा सामना पाहायला मिळू शकतो.