Rani Rampal: १६ वर्षे भारतीय संघाचं प्रतिनिधित्व; माजी कर्णधाराची अचानक निवृत्ती

हॉकी विश्वातून एक मोठी बातमी समोर येत आहे. भारतीय महिला हॉकी संघाची माजी कर्णधार राणी रामपालने निवृत्तीची घोषणा केली आहे. गेली १६ वर्षे तिने भारताचं प्रतिनिधित्व केलं. यादरम्यान तिने अनेक महत्वाच्या सामन्यांमध्ये गोल केले.

तिच्या नावे भारतासाठी खेळताना २५४ सामन्यांमध्ये १२० गोल करण्याची नोंद आहे. २०२० मध्ये झालेल्या टोकियो ऑलिम्पिक स्पर्धत ती भारतीय संघाची कर्णधार होती. या स्पर्धेत भारतीय संघाने सेमीफायनलपर्यंत मजल मारली होती.

निवृत्तीनंतर काय म्हणाली राणी रामपाल?

पीटीआयने दिलेल्या वृत्तानुसार, राणी रामपाल म्हणाली की, ' हा प्रवास खूप चांगला होता. मी कधीच विचार केला नव्हता की, मला भारतासाठी इतके वर्ष खेळण्याची संधी मिळेल. गरिबी मी खूप जवळून पाहिली आहे. त्यामुळे मला काहीतरी मोठं करायचं होतं. देशाचं प्रतिनिधित्व करणं हे माझं स्वप्नं होतं.

राणी रामपाल ही केवळ २९ वर्षांची आहे. तिला वयाच्या १४ व्या वर्षी भारतासाठी पदार्पण करण्याची संधी मिळाली. हरियाणाच्या छोट्याश्या गावातून येणाऱ्या राणीची परिस्थिती खूप हालाखीची होती. तिचे वडील गाडी ओढण्याचं काम करायचे.

मात्र तिने स्वप्नं पाहिलं आणि ते पूर्णही केलं. २०२३ मध्ये ती भारतीय संघासाठी आपला शेवटचा सामना खेळताना दिसून आली. संघातील कोचने तिला अचानक संघाबाहेर करण्याचा निर्णय घेतला. तिला संघाबाहेर करण्याचं कारणही सांगण्यात आलं नव्हतं