Dinesh Karthik Apologies: 'भावांनो, खूप मोठी चूक झाली..',दिनेश कार्तिकला लाईव्ह VIDEO मध्ये मागावी लागली माफी

भारतीय संघाचा माजी यष्टिरक्षक फलंदाज दिनेश कार्तिक पुन्हा एकदा चर्चेत आला आहे. दिनेश कार्तिकने काही दिवसांपूर्वी भारताची ऑल टाईम ग्रेट प्लेइंग ११ ची निवड केली होती. ही प्लेइंग ११ निवडताना त्याने एक चूक केली होती. त्याने आपल्या प्लेइंग ११ मध्ये एमएस धोनीचा समावेश केला नव्हता. दरम्यान कार्तिकने आता आपली चूक मान्य केली आहे.

एमएस धोनीला आपल्या प्लेइंग ११ मध्ये स्थान न दिल्याने दिनेश कार्तिकवर जोरदार टीका केली होती. दरम्यान आता एक व्हिडिओ व्हायरल होतोय, ज्यात दिनेश कार्तिक माफी मागताना दिसून येतोय.

दिनेश कार्तिक म्हणाला की, 'भावांनो, खूप मोठी चूक झाली. खरंच ही खूप मोठी चूक होती. मला तेव्हा जाणवलं, जेव्हा या गोष्टी माझ्या समोर आल्या. तुम्हाला विश्वास बसेल का? एक यष्टीरक्षक असून मी यष्टीरक्षकाला संघात स्थान द्यायला विसरलो. ही खूप मोठी चूक आहे.'

तसेच तो पुढे म्हणाला की, 'धोनी आतापर्यंत खेळलेल्या खेळाडूंमधून दिग्गज खेळाडूंपैकी एक आहे. मला जर त्या संघात १ बदल करण्याची संधी मिळाली, तर तो धोनी असेल. मी त्याची सातव्या क्रमांकावर खेळण्यासाठी निवड करेल. तो कुठल्याही भारतीय संघाचा कर्णधार असेल.'

या दिग्गज खेळाडूंनाही वगळलं

काही दिवसांपूर्वी दिनेश कार्तिकने भारताच्या ऑल टाईम ग्रेट प्लेइंग ११ ची निवड केली होती. या संघात त्याने विरेंद्र सेहवाग, रोहित शर्मा, राहुल द्रविड आणि विराट कोहलीसारख्या दिग्गज खेळाडूंना स्थान दिलं होतं.

मात्र तो धोनीला स्थान द्यायला विसरला होता. यासह या भारताला पहिला वर्ल्डकप जिंकून देणारे कपिल देव, त्यानंतर सौरव गांगुली आणि वर्ल्डकपच्या २ फायनलमध्ये निर्णायक खेळी करणाऱ्या गौतम गंभीरलाही या संघात स्थान देण्यात आलेलं नाही.

अशी आहे दिनेश कार्तिकने निवडलेली ऑल टाईम ग्रेट प्लेइंग ११:

विरेंद्र सेहवाग, रोहित शर्मा, राहुल द्रविड, सचिन तेंडुलकर, विराट कोहली, युवराज सिंग, रविंद्र जडेजा, आर अश्विन, अनिल कुंबळे, जसप्रीत बुमराह, जहीर खान.

१२ वा खेळाडू: हरभजन सिंग