Cricket : अल्पवयीन मुलीवर अत्याचार! कोर्टाने याचिका फेटाळली, प्रसिद्ध क्रिकेटपटूच्या अडचणी वाढल्या

Cricket News : अल्पवयीन मुलीवर बलात्कार केल्याप्रकरणी पोक्सो कायद्याअंतर्गत दाखल झालेल्या गुन्ह्यात क्रिकेटपटू यश दयालच्या अडचणी वाढल्याचे म्हटले जात आहे. या प्रकरणी राजस्थानमधील जयपूर न्यायालयात सुनावणी झाली. सुनावणीदरम्यान न्यायालयाने यश दयालला कोणताही दिलासा देण्यास नकार दिला आहे. सुनावणीत पीडितेचे वकील उपस्थित होते. उच्च न्यायालयाने यश दयालची अटक आणि पोलीस कारवाई थांबवलेली नाही.

जयपूर उच्च न्यायालयाकडून दिलासा न मिळाल्याने यश दयाल यांच्या अडचणी वाढणार आहेत. न्यायालयात सुनावणीदरम्यान यश दयालने पुन्हा एकदा मला एका कटात अडकवण्याचा प्रयत्न केले जात आहे, असा युक्तिवाद केला होता. या प्रकरणाची अंतिम सुनावणी उच्च न्यायालयात सप्टेंबर महिन्याच्या पहिल्या आठवड्यात होईल असे म्हटले जात आहे.

या प्रकरणाच्या मागील सुनावणीदरम्यान राजस्थान उच्च न्यायालयाने रॉयल चॅलेंजर्स बंगळुरू संघाचा वेगवान गोलंदाज यश दयालची अटक थांबवण्यास नकार दिला होता. पीडिता अल्पवयीन आहे. त्यामुळे अटक आणि पोलीस कारवाई थांबवता येणार नाही, असे उच्च न्यायालयाने स्पष्ट केले होते. या प्रकरणात न्यायालयाने केस डायरी मागवली होती.

२३ जुलै रोजी जयपूरमधील सांगानेर पोलीस स्टेशनमध्ये एका तरुणीने यश दयालच्या विरोधात बलात्काराचा गुन्हा दाखल केला होता. माझी २०२३ मध्ये यश दयालशी भेट झाली. तेव्हा मी १७ वर्षांची होते. क्रिकेटमध्ये करिअर घडवण्याचे आश्वासन देत यशने माझे भावनिक आणि शारीरिक शोषण केल्याचा आरोप पीडितेने केला. या प्रकरणात यश दयालने अलाहाबाद उच्च न्यायालयात याचिका दाखल केली होती. त्यानंतर न्यायालयाने १५ जुलै रोजी त्याच्या अटकेवर बंदी घातली होती.