श्रिलंकेच्या क्रिकेटपटूंनी तोडला कोरोनाचा प्रोटोकॉल; मंडळाने सुनावली कठोर शिक्षा

मर्यादित षटकांची मालिका खेळण्यासाठी इंग्लंडमध्ये (England) दाखल झालेल्या श्रीलंकेच्या क्रिकेट संघातील तीन खेळाडूंना कोरोना प्रोटोकॉल (Coronavirus) तोडल्याबद्दल दोषी ठरवले आहे. इंग्लंड दौर्‍यादरम्यान श्रीलंका क्रिकेटने (SLC) फलंदाज कुसल मेंडिस आणि विकेटकीपर निरोशन डिकवेला सोबत तीन क्रिकेटपटूंना बायो-बबलचे उल्लंघन केल्यामुळे (कोरोनाविरूद्ध संरक्षण करण्यासाठी खेळाडूंसाठी तयार केलेले सुरक्षित वातावरण) निलंबित केले व त्वरित त्यांना मायदेशी जाण्याचे आदेश दिले आहेत.

या दोघांव्यतिरिक्त तिसर्‍या टी -20 आंतरराष्ट्रीय सामन्यात श्रीलंकेच्या पराभवानंतर सलामीवीर धनुष्का गुणातीलका रात्री डरहॅमच्या रस्त्यावर फिरताना दिसला. या सामन्यात श्रीलंकेला 89 धावांनी दणदणीत पराभव पत्करावा लागला. तिन्ही खेळाडू या सामन्यात सहभागी झाले होते.

एसएलसीचे सचिव मोहन डी सिल्वा यांनी सांगितले की, “श्रीलंका क्रिकेटच्या कार्यकारी समितीने कुसल मेंडिस, धनुष्का गुणतीलका आणि निरोशन डिकवेला यांना बायो-बबलचे उल्लंघन केल्याबद्दल निलंबित केले आहे आणि त्यांना त्वरित श्रीलंकेत परत जाण्यास सांगण्यात आले आहे,” एसएलसीचे सचिव मोहन डी सिल्वा यांनी पोस्ट केलेल्या व्हिडिओला उत्तर देताना सांगितले की त्यांनी आचारसंहितेचे उल्लंघन केल्यामुळे त्यांची चौकशी सुरू आहे.

शनिवारी संपलेली टी -20 मालिका श्रीलंकेने गमावली होती. ऑक्टोबर 2020 नंतर सलग पाचव्या टी -20 मालिकेत पराभवाला सामोरे जावे लागले. श्रीलंका आता इंग्लंडविरुद्ध तीन एकदिवसीय सामन्यांची मालिका खेळणार आहे. त्यांचा पहिला सामना 29 जून रोजी चेस्टर ली स्ट्रीट येथे खेळला जाणार आहे.

Edited By : Pravin Dhamale