Shubman Gill: टीम इंडियाला मोठा धक्का! कोलकाता टेस्टमधून शुभमन गिल बाहेर; 'या' खेळाडूकडे कर्णधारपदाची धुरा

भारत आणि दक्षिण आफ्रिका यांच्यातील पहिला टेस्ट सामना सामना कोलकात्याच्या ईडन गार्डन्स स्टेडियमवर खेळला जातोय. या सामन्यात टीम इंडियाला मोठा धक्का बसला आहे. कर्णधार शुभमन गिलला मानेला दुखापत झाल्यामुळे संपूर्ण सामन्यातून बाहेर व्हावं लागलंय.बीसीसीआयने ट्विट करत याची माहिती दिलीये.

काय म्हटलंय बीसीसीआयने?

बीसीसीआयने एक्स अकाऊंटवर ट्विट करत म्हटलंय की, शुभमन गिल आता या टेस्ट सामन्यात खेळणार नाही. सध्या तो रुग्णालयात असून बीसीसीआयची वैद्यकीय टीम त्याच्यावर लक्ष ठेवून आहे.

आता कोलकाता टेस्टमध्ये कर्णधार कोण?

कोलकाता टेस्टमध्ये आता भारतासाठी ऋषभ पंत कर्णधारपद सांभाळणार आहेत. कारण पंत हा भारताच्या टेस्ट टीमचा तो उपकर्णधार आहे. कर्णधार अनुपस्थित असताना उपकर्णधारच टीमचं नेतृत्व करतो.

शुभमन गिलला दुखापत कशी झाली?

पहिल्या डावात शुभमन गिल फलंदाजीसाठी आला होता. मात्र, तो फक्त तीन बॉल खेळू शकला. यानंतर शुभमन रिटायर्ड हर्ट झाला. तिसऱ्या बॉलवर गिलने चौकार मारला होता. पण या चौकारानंतर त्याला मानेला वेदना जाणवू लागल्या. गिलला होणाऱ्या वेदना पाहता फिजिओ मैदानावर आले आणि गिलला बाहेर जावं लागलं. त्यानंतर गिल पहिल्या डावात पुन्हा फलंदाजीसाठी आला नाही.

दक्षिण आफ्रिकेचा कर्णधार टेम्बा बावुमाने भारताविरुद्ध टॉस जिंकून प्रथम फलंदाजी करण्याचा निर्णय घेतला होता. मात्र, दक्षिण आफ्रिका पहिल्या डावात 159 धावांवर सर्वबाद झाली. भारतासाठी जसप्रीत बुमराहने पाच विकेट घेतल्या. त्यानंतर टीम इंडियाचा खेळही काही फारसा चांगला झाला नाही. संपूर्ण भारतीय टीमने पहिल्या डावात 189 रन्स करत 30 रन्सची आघाडी घेतली.