WTC Points Table: टीम इंडियाला मोठा धक्का! बांगलादेशच्या ऐतिहासिक विजयानंतर WTC च्या पॉईंट्स टेबलचं समीकरण बदललं

WTC Points Table:

न्यूझीलंडचा संघ बागंलादेश दौऱ्यावर आहे. या दोन्ही संघांमध्ये २ कसोटी सामन्यांची मालिका सुरु आहे. या मालिकेतील पहिल्या कसोटी सामन्यात बांगलादेशने न्यूझीलंडचा धूव्वा उडवत १५० धावांनी विजय मिळवला आहे. या विजयासह बांगलादेशने कसोटी मालिकेत १-० ची आघाडी घेतली आहे. दरम्यान या विजयासह बांगलादेशने वर्ल्ड टेस्ट चॅम्पियनशिप स्पर्धेच्या गुणतालिकेत आपलं खातं उघडलं आहे.

१८१ वर आटोपला न्यूझीलंडचा डाव..

बांगलादेशचा गोलंदाज ताइजुल या डावात चमकला. त्याने पहिल्या डावात १०९ धावा खर्च करत ४ गडी बाद केले. तर दुसऱ्या डावात त्याने ७५ धावा खर्च करत ६ गडी बाद केले. न्यूझीलंडला विजय मिळवण्यासाठी ३३२ धावांची गरज होती.

या धावांचा पाठलाग करताना न्यूझीलंडचा डाव अवघ्या १८१ धावांवर संपुष्टात आला. ताईजुलसह फिरकी गोलंदाज नईम हसनने देखील या डावात अप्रतिम गोलंदाजी केली. त्याने ४० धावा करत २ गडी बाद केले. तर शोरफुल इस्लामने १ आणि मेहदी हसनने १ गडी बाद केला.

बांगलादेशच्या विजयाने भारतीय संघाचं नुकसान..

बांगलादेशच्या विजयानं भारतीय संघाला मोठा धक्का बसला आहे. वर्ल्ड टेस्ट चॅम्पियनशिपच्या गुणतालिकेत बांगलादेशने १२ गुणांची कमाई केली आहे. तर विजयाची सरासरी १०० टक्के इतकी झाली आहे.

सध्या बांगलादेशचा संघ गुणतालिकेत दुसऱ्या स्थानी पोहोचला आहे. तर भारतीय संघ तिसऱ्या स्थानी पोहोचला आहे. भारतीय संघाने २ सामने खेळले आहेत. यापैकी एका सामन्यात भारतीय संघाने विजय मिळवला आहे.तर सामना ड्रॉ राहिला आहे. भारतीय संघ १६ गुणांसह तिसऱ्या स्थानी आहे.तर भारतीय संघाची विजयाची सरासरी ६६.६७ इतकी आहे. (Latest sports updates)

पाकिस्तानचा संघ अव्वल स्थानी..

वर्ल्ड टेस्ट चॅम्पियनशिप स्पर्धेच्या गुणतालिकेत पाकिस्तानचा संघ अव्वल स्थानी आहे. पाकिस्तान आणि श्रीलंका या दोन्ही संघांमध्ये २ कसोटी सामन्यांची मालिका खेळली गेली होती. या मालिकेतील दोन्ही सामन्यांमध्ये पाकिस्तानने बाजी मारली होती. २४ गुणांसह पाकिस्तानचा संघ अव्वल स्थानी आहे.

तर चौथ्या स्थानी ऑस्ट्रेलियाचा संघ तर पाचव्या स्थानी वेस्टइंडिजचा संघ आहे. येत्या काही दिवसात भारतीय संघ दक्षिण आफ्रिकेविरुद्ध २ कसोटी सामन्यांची मालिका खेळण्यासाठी मैदानावर उतरणार आहे. या मालिकेत भारतीय संघाने विजय मिळवला, तर गुणतालिकेत मोठा उलटफेर पाहायला मिळू शकतो.