Hardik Pandya Fined: लाजिरवाण्या पराभवानंतर मुंबई इंडियन्सला मोठा धक्का! हार्दिक पंड्यावर BCCI ने घेतली मोठी ॲक्शन

लखनऊच्या अटल बिहारी वाजपेयी स्टेडियमवर लखनऊ सुपरजायंट्स आणि मुंबई इंडियन्स या दोन्ही संघांमध्ये स्पर्धेतील ४८ वा सामना पार पाडला. या सामन्यात मुंबई इंडियन्स संघाला पराभवाचा सामना करावा लागला आहे. या लाजिरवाण्या पराभवानंतर मुंबई इंडियन्स संघाला आणखी एक मोठा धक्का बसला आहे. मुंबई इंडियन्स संघाचा कर्णधार हार्दिक पंड्यावर बीसीसीआयने मोठी कारवाई केली आहे.

नेमकं कारण काय?

लखनऊ सुपरजायंट्स संघाविरुद्ध झालेल्या सामन्यात मुंबई इंडियन्स संघाला निर्धारीत वेळेत २० षटकं पूर्ण करता आले नाहीत. त्यामुळे हार्दिक पंड्यावर कारवाई करण्यात आली आहे. मुंबई इंडियन्सने दुसऱ्यांदा ही चूक केली आहे. त्यामुळे कर्णधार हार्दिक पंड्यावर २४ लाखांचा दंड आकारण्यात आला आहे. यासह प्लेइंग ११ (इम्पॅक्ट प्लेअरसह) मध्ये असलेल्या खेळाडूंवर ६ लाख किंवा मॅच फी च्या २५ टक्के दंड आकारण्यात आला आहे.

यापूर्वी पंजाब किंग्ज संघाविरुद्ध झालेल्या सामन्यातही हार्दिक पंड्याने ही चूक केली होती. त्यावेळी हार्दिक पंड्यावर १२ लाखांचा दंड आकारण्यात आला होता. आता दुसऱ्यांदा चूक केल्यामुळे हार्दिक पंड्यावर २४ लाखांचा दंड आकारण्यात आला आहे. यासह प्लेइंग ११ मध्ये असलेल्या खेळाडूंवर ६ लाखांचा दंड आकारण्यात आला आहे.

ही चूक त्याने तिसऱ्यांदा केल्यास त्याच्यावर ३० लाखांचा दंड आकारण्यात येईल. यासह त्याच्यावर १ सामन्याची बंदी देखील घातली जाईल. तसेच संघातील इतर खेळाडूंवर १२ लाखांचा दंड आकारला जाईल. त्यामुळे इथून पुढे हार्दिक पंड्याला सावध राहावं लागणार आहे.

या सामन्याबद्दल बोलायचं झालं, तर मुंबई इंडियन्स संघाने प्रथम फलंदाजी करत २० षटकअखेर १४४ धावांची खेळी केली. या धावांचा पाठलाग करताना लखनऊ सुपरजायंट्स संघांकडून मार्कस स्टोइनिसने शानदार कामगिरी करत संघाला विजय मिळवून दिला.