Ben Stokes vs Siraj : सिराजचा घातक चेंडू, बेन स्टोक्स व्हिवळला! थेट गुडघ्यावर बसला; पुन्हा उठताच येईना, VIDEO

मोहम्मद सिराज आणि बेन स्टोक्सची मैदानातील 'ठस्सन' प्रेक्षकांना काही नवीन नाही. सिराज जेव्हा गोलंदाजीला येतो तेव्हा 'तुफान' घेऊन येतो हे आतापर्यंत बेन स्टोक्सच्या डोक्यात गेलं नसेल तरच नवल! तिसऱ्या कसोटी सामन्यात जो प्रसंग घडला त्याचीच पुनरावृत्ती चौथ्या कसोटीच्या तिसऱ्या दिवशी मैदानात घडली. सिराजनं फेकलेला चेंडू बेन स्टोक्सच्या थेट ग्रोइन एरियावर जाऊन जोरात आदळला. त्यानंतर बेन स्टोक्स वेदनेनं व्हिवळू लागला. तो थेट मैदानावरच गुडघ्यावर बसला.

मँचेस्टर कसोटीच्या तिसऱ्या दिवशी (India vs England 4th Test, 3rd day) बेन स्टोक्ससोबत जे घडलं ते बघून सामना तल्लीन होऊन सामना पाहणारा प्रत्येक इंग्लिश फॅन 'अरेरे' अशी प्रतिक्रिया देत मैदानात नेमकं काय घडलं याचा कानोसा घेऊ लागला. कारण मोहम्मद सिराजनं फेकलेला चेंडू स्टोक्सच्या ग्रोइन एरियावर लागला. त्यानंतर स्टोक्स मैदानावरच गुडघ्यावर बसला. त्याच्या चेहऱ्यावर होणाऱ्या वेदना स्पष्ट दिसत होत्या. बेन स्टोक्सचा हा व्हिडिओ सोशल मीडियावर व्हायरल होत आहे.

मोहम्मद सिराजचा आत येणारा चेंडू टोलवताना स्टोक्स हुकला. तो थेट स्टोक्सच्या एब्डोमिनल गार्डवर जाऊन आदळला. त्यानंतरची स्टोक्सची झालेली अवस्था बघून सगळ्याच फॅन्सच्या काळजाचा ठोका चुकला. विशेष म्हणजे मोहम्मद सिराजनं फेकलेला चेंडू जेव्हा स्टोक्सच्या लागला त्यावेळी सिराजनं डीएसपी स्टाइल लूक दिला. त्यानंतर सिराज आपल्या रनअपवर निघून गेला.

स्टोक्स मैदानात गुडघ्यावरच बसला. वेदना होत असताना स्टोक्स पुन्हा सावरला आणि काही वेळातच तो पुन्हा फलंदाजीसाठी सज्ज झाला. अष्टपैलू स्टोक्सनं फलंदाजीनं सगळ्यांना प्रभावित केलंच आहे, शिवाय याआधी त्यानं गोलंदाजीतही कमाल दाखवून दिली आहे.

बेन स्टोक्सनं पहिल्या डावात पाच विकेट घेतल्या होत्या. त्याच्या भेदक गोलंदाजीच्या जोरावर भारताला ३५८ धावांवर रोखता आलं. स्टोक्सने पाचव्यांदा पाच विकेट घेण्याचा प्रताप केला आहे. स्टोक्स हा कसोटी क्रिकेटमध्ये पाच वेळा फाइव्ह विकेट हॉल आणि १० हून अधिक शतके ठोकणारा जगातील चौथा अष्टपैलू खेळाडू ठरला आहे. स्टोक्सनं घेतलेले पाच विकेट्स हे खास ठरले आहेत. कारण आठ वर्षांनी त्याने ही उल्लेखनीय कामगिरी केली आहे. २०१७ मध्ये त्याने अशी कामगिरी केली होती.

जो रूटनं उडवून दिली धम्माल

बेन स्टोक्सनं गोलंदाजी आणि फलंदाजीतही शानदार कामगिरी केली. दुसरीकडे जो रूटनंही फलंदाजीत धमाल उडवून दिली. कसोटी कारकीर्दीत त्यानं ३८ वे शतक ठोकले. या मालिकेतील त्याचे दुसरे शतक ठरले आहे. रूटने भारताविरुद्ध एका संघाविरोधात सर्वाधिक धावा करण्याचा विक्रमही केला. त्याने भारताविरुद्ध इंग्लंडमध्ये १९०० हून अधिक धावा केल्या आहेत.