Asia Cup 2023 Points Table: आशिया कप २०२३ स्पर्धेतील सुपर-४ फेरीतल्या सामन्यात टीम इंडियाने पाकिस्तानवर तब्बल २२८ धावांनी दणदणीत विजय मिळवला. भारतीय संघाने एकदिवसीय सामन्यात पाकिस्तानविरुद्ध मिळवलेला हा सर्वात मोठा विजय आहे. या विजयामुळे टीम इंडियासह क्रिडाप्रेमींमध्ये आनंदाचं वातावरण आहे. दरम्यान, मोठ्या विजयानंतर भारतीय संघाला अजून एक गुड न्यूज मिळाली आहे. (Latest Marathi News)
या सामन्यापूर्वी पाकिस्तानचा संघ आशिया कप २०२३ गुणतालिकेत पहिल्या स्थानावर होता. त्यांनी यापूर्वी बांग्लादेशविरुद्धच्या सामन्यात मोठ्या फरकाने विजय मिळवला होता. आता भारताविरुद्धच्या दारुण पराभवानंतर पाकिस्तानची थेट तिसऱ्या स्थानावर घसरण झाली आहे.
दुसरीकडे भारतीय संघ या सामन्यापूर्वी तिसऱ्या स्थानावर होता. टीम इंडियाच्या (Team India) खात्यात एकही गुण जमा झालेला नव्हता. पण पाकिस्तानविरुद्धच्या विजयानंतर सर्व समीकरण ब़दलले आहे. कारण या विजयानंतर भारतालाही दोन गुण मिळाले आहेत. त्यामुळे सध्याच्या घडीला भारत, पाकिस्तान आणि श्रीलंका या तिन्ही संघांचे समान दोन गुण आहेत.
पण, भारताने या सामन्यात मोठा विजय मिळवला आणि त्याचा फायदा नेट रनरेटमध्ये झाला आहे. या सामन्यानंतर भारताचा रन रेट हा ४.५६० एवढा झाला आहे. गुणतालिकेत हा सर्वात जास्त रन रेट आहे, त्यामुळे भारतीय संघाने या गुणतालिकेत अव्वल स्थान पटकावले आहे.
पाकिस्तानचेही दोन गुण असले तरी त्यांना मोठा पराभव पत्करावा लागला. त्यामुळे त्यांचा रन रेट - १.८९२ असा झाला आहे. हा सर्वात कमी रन रेट आहे. त्यामुळे पाकिस्तानचा संघ हा गुणतालिकेत पहिल्या स्थानावरून थेट तिसऱ्या स्थानावर ढकलला गेला आहे. त्यामुळे पाकिस्तानचं टेन्शन वाढलं आहे.
Edited by - Satish Daud
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.