महाराष्ट्राचा सुपुत्र अजिंक्य पवारची प्रो कबड्डीच्या लिलावात लॉटरी लागली आहे. प्रो कबड्डीच्या ११ व्या हंगामासाठी लिलाव सुरू आहे. या लिलावातील पहिल्या दिवशी (१५ ऑगस्ट) बऱ्याच खेळाडूंवर कोट्यावधींची बोली लागली. त्यापैकीच एक खेळाडू म्हणजे मराठमोळा अजिंक्य पवार. बेंगलुरू बुल्सने त्याला १.१०७ कोटींची बोली लावत आपल्या संघात स्थान दिलं आहे.
लिलावात बी कॅटेगरीमध्ये असणाऱ्या अजिंक्य पवारची बेस प्राईज २० लाख रुपये इतकी होती. मात्र लेफ्ट रेडर असलेल्या अजिंक्यला आपल्या संघात घेण्यासाठी जयपूर पिंक पँथर्स, युपी योद्धा आणि बेंगलुरू बुल्स यांच्यात चुरशीची लढत पाहायला मिळाली. शेवटी बेंगलुरू बुल्सने १.१०७ कोटी रुपये मोजत त्याला आपल्या संघात स्थान दिलं.
अजिंक्य पवारबद्दल बोलायचं झालं, तर त्याने जयपूर पिंक पँथर्स संघाकडून आपल्या प्रो कबड्डी कारकिर्दीची सुरुवात केली होती. त्यानंतर तो तमिळ थलाईवाज संघाकडून खेळू लागला. अतिशय चपळ आणि डाव्या बाजूने चढाई करणाऱ्या या खेळाडूची बेंगलुरू बुल्सला गरज होती. त्यामुळे त्यांनी डाव साधला आणि मोठी किंमत मोजत त्याला आपल्या ताफ्यात स्थान दिलं.
अजिंक्य पवार गेल्या ३ वर्षांपासून तमिळ थलाईवाज संघासाठी खेळतोय. या संघाकडून खेळताना १०० पेक्षा अधिक गुणांची केली आहे. आता त्याला बेंगलुरू बुल्सकडून खेळण्याची संधी मिळाली आहे. जयपूर पिंक पँथर्सकडून खेळताना त्याने आपल्या प्रो कबड्डी कारकिर्दीची सुरुवात केली खरी मात्र त्याला ओळख मिळाली ती तमिळ थलाईवाज कडून खेळताना. या संघाला प्लेऑफमध्ये पोहचवण्यात त्याने अतिशय मोलाची भूमिका बजावली होती.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.