Indian Army Recruitment: देशसेवा करण्याची तरुणांना सुवर्णसंधी; भारतीय सैन्यदलात ३७९ जागांसाठी भरती, वाचा डिटेल्स

देशसेवा करण्याची इच्छा असणाऱ्या तरुणांसाठी आनंदाची बातमी आहे. भारतीय सैन्याने शॉर्ट सर्व्हिस कमिशन कोर्ससाठी भरती जाहीर केली आहे. या कोर्ससाठी इच्छुक उमेदवार अर्ज करु शकतात. यासाठी तुम्हाला joinindianarmy.nic.in वर जाऊन अर्ज करु शकतात. या मोहिमेत ३७९ रिक्त जागांसाठी भरती जाहीर केली आहे.

या भरतीसाठी नोंदणी प्रक्रिया सुरु झाली असून १४ ऑगस्ट २०२४ ही अर्ज करण्याची शेवटची तारीख आहे. याबाबत सर्व माहिती अधिकृत वेबसाइटवर देण्यात आली आहे. या नोकरीसाठी SSC (Tech) पुरुष पदासाठी ३५० रिक्त जागा आहेत. तर SSC (Tech) महिला पदासाठी २९ जागा रिक्त आहेत.

या नोकरीसाठी शैक्षणिक पात्रता निश्चित करण्यात आली आहे. इंजिनियर पदवी प्राप्त किंवा या अभ्यासक्रमाच्या शेवटच्या वर्षात अभ्यास करणारे उमेदवार या नोकरीसाठी अर्ज करु शकतात. इंजिनियरिंगच्या शेवटच्या वर्षात असलेल्या उमेदवारांना १ एप्रिल २०२५ पर्यंत सर्व परीक्षांच्या गुणपत्रिका सादप करायच्या आहेत. त्यानंतर त्यांना प्री कमिशनिंग ट्रेनिंग अकादमी येथे प्रशिक्षण दिले जाईल.

२० ते २७ वयोगटातील उमेदवार या नोकरीसाठी अर्ज करु शकतात. या नोकरीमध्ये भारतीय सशस्त्र दलाच्या संरक्षण कर्मचाऱ्यांच्या विधवांसाठी शैक्षणिक पात्रता वेगळी आहे.

या नोकरीसाठी उमेदवाराची निवड कट ऑफच्या आधारे केली जाईल.या नोकरीसाठी उमेदवारांची निवड दोन टप्प्यांमध्ये केली जाईल. पहिल्या टप्प्यात पास झालेले उमेदवार दुसऱ्या टप्प्यापर्यंत जातील. त्यांमी SSB मुलाखतीद्वारे गुणांवर मिळालेल्या गुणांवर आधारित उमेदवारांची निवड केली जाईल.