YouTuber Devraj Patel: 'दिल से बुरा लगता है', कॉमेडियन देवराजचा रस्ते अपघातात मृत्यू

YouTuber Devraj Patel Dies In Road Accident: छत्तीसगडमधील प्रसिद्ध यूट्यूब कॉमेडियन देवराज पटेल यांचा आज रस्ते अपघातात मृत्यू झाला. अनियंत्रित भरधाव वेगात आलेल्या ट्रकने दुचाकीला मागून धडक दिली. या अपघातात YouTuber देवराज पटेल याचा जागीच मृत्यू झाला. ही घटना रायपूरच्या तेलीबंधा पोलीस स्टेशन परिसरात घडली.

“दिल से बुरा लगता है” त्याचा हा व्हिडीओ सोशल मीडियावर खूप व्हायरल झाला होता. यानंतर त्याने आपल्या युट्यूब चॅनलचे नाव देवराज पटेल हे बदलून 'दिल से बुरा लगता है', हे केलं होत. देवराज याच्या मृत्यूची बातमी समोर आल्यानंतर त्याच्या अनेक चाहत्यांनी सोशल मीडियावर दुःख व्यक्त केलं आहे.

काही दिवसांपूर्वी युट्युबर देवराज पटेल याने छत्तीसगडचे मुख्यमंत्री भूपेश बघेल यांच्या भेटीदरम्यान एक व्हिडीओ बनवला होता. हा व्हिडीओ सोशल मीडियावर व्हायरल झाला होता. व्हायरल व्हिडीओमध्ये देवराज म्हणतो की, छत्तीसगडमध्ये फक्त दोनच लोक प्रसिद्ध आहेत, एक मी आणि एक मोर काका. यानंतर मुख्यमंत्री भूपेश बघेल यांना हसू अनावर झाले.  (Latest Political News)

देवराज पटेल याने मृत्यूच्या चार तास आधी एक व्हिडीओ बनवून पोस्ट केला होता. व्हिडीओमध्ये त्याने सर्वांना अलविदा म्हटले आहे. देवराज पटेलने 2021 मध्ये प्रसिद्ध यूट्यूबर भुवन बाम सोबत कॉमेडी ड्रामा वेब सिरीज धिंडोरा मध्ये काम केलं होतं.

त्यांच्या निधनावर मुख्यमंत्री भूपेश बघेल यांनी तीव्र शोक व्यक्त केला आहे. त्यांनी ट्वीट करून लिहिले आहेकी, "दिल से बुरा लगता है" द्वारे आम्हा सर्वांना हसवणारे आणि कोट्यवधी लोकांमध्ये आपले स्थान निर्माण करणारे देवराज पटेल आज आपल्याला सोडून गेले.''