Landslide: मोठी दुर्घटना! धौलीगंगा वीज प्रकल्पाच्या बोगद्यात भूस्खलन, १९ कामगार अडकले

मुसळधार पावसामुळे उत्तरखंडच्या पिथोरागडमध्ये भूस्खलनाची घटना घडलीय. पिथोरागडमधील २८० मेगावॅट क्षमतेच्या धौलीगंगा वीज प्रकल्पाच्या सामान्य आणि आपत्कालीन बोगद्यांसमोर भूस्खलन झाले आहे. यात एनएचपीसीचे १९ कर्मचारी अडकले आहेत. भूस्खलनामुळे पॉवर हाऊसकडे जाणारा रस्ता बंद झालाय. भूस्खलनामुळे मोठ्या प्रमाणात चिखल साचलाय. दरम्यान मदत आणि बचाव कार्य तात्काळ सुरू करण्यात आले.

हाती आलेल्या माहितीनुसार, आता १९ पैकी ८ कर्मचाऱ्यांना सुरक्षितपणे बाहेर काढण्यात आले आहे. इतर ११ जणांना बाहेर काढण्याचे प्रयत्न सुरू आहेत. भूस्खलनामुळे मोठा मातीचा ढिगारा साचला आहे. ढिगारा काढण्यासाठी यंत्रे बसवण्यात आली आहेत. काही तासात रस्ता मोकळा होण्याची अपेक्षा आहे. त्यानंतर सर्व कर्मचारी बाहेर पडू शकतील, अशी माहिती अधिकाऱ्यांनी दिलीय.

धारचुलाजवळील इलागड परिसरातील धौलीगंगा वीज प्रकल्पाच्या सामान्य आणि आपत्कालीन बोगद्यांकडे जाणारा रस्ता बंद करण्यात आलाय. मुसळधार पावसामुळे भूस्खलन झाल्याचे अधिकाऱ्याने सांगितले. सीमा रस्ते संघटनेच्या जेसीबी मशीन रस्ता मोकळा करण्यात गुंतल्या आहेत. सर्व कामगार सुरक्षित आहेत. उर्वरित कामगारही लवकरच बाहेर येतील. वीज प्रकल्पातून वीजनिर्मितीचे काम नेहमीप्रमाणे सुरू असल्याची माहिती अधिकाऱ्यांनी दिलीय.

पोलिसांनी याबाबत माहिती देताना म्हणालेत, कामगार अडकलेत. मोठ्या दगडांनी बोगद्याचे प्रवेश बंद झाले आहेत. घटनास्थळी जेसीबी मशीन पाठवण्यात आल्या असून कर्मचाऱ्यांना बाहेर काढण्यात येत आहे. अडकलेले कामगार आणि कर्मचारी कंपनी आणि स्थानिक प्रशासनाच्या सतत संपर्कात आहेत. कर्मचाऱ्यांकडे आत पुरेसे अन्न आणि पेय देखील आहे.