Crime : खून का बदला खून से...! १४ वर्षानंतर बापाच्या हत्येचा घेतला बदला, धक्कादायक घटनेने गावात खळबळ

उत्तर प्रदेशातील शामली जिल्ह्यातील मंगळुरा गावातून एक धक्कादायक आणि हृदयद्रावक घटना समोर आली आहे. १४ वर्षांच्या दीर्घ कालावधीनंतर एका मुलाने आपल्या वडिलांच्या हत्येचा बदला घेतला. शनिवारी संध्याकाळी ३० वर्षीय राहुल नावाच्या तरुणाने ४५ वर्षीय जयवीर या व्यक्तीवर गोळी झाडून त्याची हत्या केली. त्यानंतर राहूल घटनास्थळावरून पसार झाला. घटनेनंतर परिसरात एकच खळबळ उडाली असून पोलिसांनी तातडीने तपास सुरू केला आहे.

माहितीनुसार, जयवीर शेतातील काम संपवून घरी जात असताना राहुलने त्याच्यावर अचानक गोळीबार केला. गोळी थेट जयवीरच्या डोक्यावर लागल्याने तो जागीच ठार झाला. गावकऱ्यांनी गोळीबाराचा आवाज ऐकून घटनास्थळी धाव घेतली आणि लगेच पोलिसांना माहिती दिली. वरिष्ठ अधिकारी पोलीस पथकासह घटनास्थळी पोहोचले. मृतदेह ताब्यात घेऊन तो पोस्टमॉर्टमसाठी पाठवला.

पोलीस तपासानुसार, या खुनामागे जुने दुश्मनी कारणीभूत असल्याचे कळाले. २०११ साली जयवीरने झिंझाना परिसरात राहुलच्या वडिलांची, ब्रिजपाल नावाच्या व्यक्तीची हत्या केली होती. या गुन्ह्यात त्याला ११ वर्षांची तुरुंगवासाची शिक्षा झाली होती. शिक्षा पूर्ण करून सुटल्यावर जयवीर गेल्या तीन वर्षांपासून आपल्या गावात शांततेत राहत होता. मात्र त्याच्या जुन्या गुन्ह्याचा परिणाम इतक्या वर्षांनी पुन्हा समोर आला. राहुलने आपल्या वडिलांच्या हत्येचा बदला घेत जयवीरचा जीव घेतला असल्याचा संशय पोलिसांनी व्यक्त केला आहे.

या प्रकरणी अतिरिक्त पोलीस अधीक्षक संतोष कुमार सिंह यांनी सांगितले की आरोपी राहुल सध्या फरार असून त्याचा शोध घेण्यासाठी विशेष पथक तयार करण्यात आले आहे. जयवीरचा मृतदेह पोस्टमॉर्टमसाठी पाठवण्यात आला असून अहवाल आल्यानंतर पुढील कायदेशीर कारवाई केली जाईल. प्रशासनाने खबरदारीचा उपाय म्हणून गावात आणि परिसरात पोलीस बंदोबस्त वाढवला आहे.

या हत्येचा बदला प्रकरणामुळे मंगळुरा गावात भीतीचे वातावरण पसरले आहे. अनेक वर्षांपूर्वी भूतकाळात घडलेला एक गुन्हा पुन्हा एकदा हत्येच्या स्वरूपात समोर आल्याने समाजात संताप निर्माण झाली आहे. पोलिसांनी नागरिकांना शांतता राखण्याचे आवाहन केले असून आरोपीला लवकरच अटक होईल, असेही अधिकाऱ्यांनी सांगितले आहे.