Accident News : महामार्गावर भीषण अपघात! कार आणि ट्रकची जोरदार धडक; एकाच कुटुंबातील चौघांचा जागीच मृत्यू

उत्तर प्रदेशातील बांदा जिल्ह्यात बुंदेलखंड द्रुतगती मार्गावर भीषण अपघात झाला आहे. गॅस सिलिंडर वाहून नेणाऱ्या ट्रकला स्कॉर्पिओ गाडीने जोरदार धडक दिल्याने चार जणांचा मृत्यू झाला, तर एक तरुणी गंभीर जखमी झाली आहे. धक्कादायक म्हणजे हे चौघेही एकाच कुटुंबातील असल्याचे उघडकीस आले आहे. या अपघातानंतर मोठ्या प्रमाणावर वाहतूक कोंडी झाली होती. पोलिसांच्या तत्परतेने तातडीने वाहतूक सुरळीत झाली.

मिळालेल्या माहितीनुसार, हा अपघात कोतवाली देहात पोलीस ठाण्याच्या हद्दीत घडला. स्कॉर्पिओ गाडीमध्ये एकाच कुटुंबातील पाच जण प्रवास करत होते. हे सर्वजण आझमगड जिल्ह्यातील रामगड येथील रहिवासी असून कबरईकडे जात होते. दरम्यान, गाडीने मागून मालवाहू ट्रकला धडक दिली. धडक इतकी भीषण होती की, स्कॉर्पिओचा चक्काचूर झाला.

या अपघातात तीन जणांचा जागीच मृत्यू झाला, तर एकाचा रुग्णालयात उपचारादरम्यान मृत्यू झाला. मृतांमध्ये स्कॉर्पिओ चालकाचाही समावेश आहे. अपघातात एक २० वर्षीय महिला गंभीर जखमी झाली असून तिला तात्काळ जिल्हा रुग्णालयात दाखल करण्यात आले. प्राथमिक उपचारानंतर तिची प्रकृती चिंताजनक असल्याने तिला पुढील उपचारांसाठी कानपूर येथे हलवण्यात आले आहे.

अपघाताची माहिती मिळताच पोलीस, अग्निशमन दल आणि बचाव पथके घटनास्थळी दाखल झाली. त्यांनी तातडीने बचावकार्य सुरू करत जखमींना बाहेर काढले आणि रुग्णालयात हलवले. या घटनेमुळे काही काळ वाहतूक विस्कळीत झाली होती. मात्र, प्रशासनाने तत्काळ उपाययोजना करत वाहतूक सुरळीत केली.

जिल्हाधिकारी अमित असेरी यांनी घटनास्थळी भेट देत परिस्थितीचा आढावा घेतला. त्यांनी सांगितले की, मृतदेह शवविच्छेदनासाठी पाठवण्यात आले असून, जखमी तरुणीला सर्वोत्तम वैद्यकीय उपचार दिले जात आहेत. दरम्यान, पोलीस अधीक्षक पलाश बन्सल यांनी प्राथमिक चौकशीत स्कॉर्पिओ चालकाला डुलकी लागल्यामुळे हा अपघात झाल्याची शक्यता व्यक्त केली आहे. या प्रकरणी पुढील तपास सुरू असून संबंधितांवर कायदेशीर कारवाई करण्यात येणार आहे.