भीषण! भरधाव डंपरनं गर्भवतीला चिरडलं; अर्भक रस्त्यावर पडलं, महिलेचा दुर्देवी मृत्यू

उत्तरप्रदेशातील इटावा येथून भीषण अपघाताची घटना समोर आली आहे. गर्भवती महिलेचा अपघातात दुर्देवी मृत्यू झाला आहे. इकदिल पोलीस स्टेशन परिसरातील पिलखार गावाजवळ गर्भवती महिला औषध घेऊन जात असताना हा अपघात घडला. भरधाव डंपरने महिलेला चिरडले असून, या अपघातात महिलेचा जागीच मृत्यू झाला. या धक्कादायक अपघातात महिलेच्या पोटातील अर्भक रस्त्यावर पडले. या अपघातात पीडितेचे वडील आणि भाऊ गंभीर जखमी झाले आहेत.

मिळालेल्या माहितीनुसार, भरथानातील भिलोना गावातील रहिवासी भूपसिंग हे आपल्या २२ वर्षीय मुलगी साधना आणि मुलगा देवेश यांच्यासोबत खासगी रुग्णालयातून औषध घेऊन परतत होते. पिलखार गावाजवळ महामार्गावर अचानक भरधाव डंपर आला. डंपरने दुचाकीला जोरदार धडक दिली. धडकेनंतर तिघे रस्त्यावर फेकले गेले. यादरम्यान डंपरने साधना यांना चिरडले आणि घटनास्थळावरून पसार झाला.

प्रत्यक्षदर्शींनी सांगितले की, अपघात एवढा भयंकर होता की साधनाच्या पोटातील तीन महिन्यांचा अर्भक रस्त्यावर पडले. घटनेनंतर परिसरात मोठी गर्दी जमली. तर जखमी वडील रडतच रस्त्यावर पडून राहिले. माहिती मिळताच पोलिस घटनास्थळी पोहोचले. पोलिसांनी साधनाचा मृतदेह ताब्यात घेतला. तसेच शवविच्छेदनासाठी रूग्णालयात पाठवले.

तसेच इतर जखमींना उपचारासाठी रुग्णालयात हलवण्यात आलं आहे. कुटुंबीयांनी सांगितलं की, साधनाचं १३ मे रोजी लग्न झालं होतं. तिचा पती सिंतु हा कामगार असून साधना रक्षाबंधनाच्या दिवशी माहेरी आली होत. साधना काही दिवस तिथेच राहिली होती. दुर्दैवाने, कालच तिचा अपघाती मृत्यू झाला.

दरम्यान, राष्ट्रीय महामार्ग-१९ वर अपघातानंतर डंपर चालक वाहनासह फरार झाला असून, पोलिस त्याचा शोध घेत आहेत. चालकाला पकडण्यासाठी सतत छापेमारी सुरू असल्याचं पोलिसांनी सांगितलं.