Cough Syrup Deaths : 2 राज्य, एक गंभीर आजार आणि १२ लहान मुलांचा मृत्यू; विषारी औषध आणखी किती जणांचा जीव घेणार?

मध्य प्रदेश आणि राजस्थानमध्ये कफ सिरप प्यायल्याने १० हून अधिक लहान मुलांचा मृत्यू झाल्याची घटना घडली आहे. मागील २५ दिवसांत आतापर्यंत १२ लहान मुलांचा मृत्यू झाल्याची अधिकृत माहिती हाती आली आहे. लहान मुलांना सर्दी आणि खोकला झाल्यानंतर कफ सिरप पाजलं. मात्र, पुढील काही दिवसांत या लहान मुलांचा मृत्यू झाल्याची माहिती समोर आलीये.

कफ सिरप पिऊन मृत्यूमुखी पडलेले सर्व लहान मुले ५ वर्षाखालील होती. या लहान मुलांना ताप आणि सर्दीचा त्रास झाला होता. त्यानंतर स्थानिक डॉक्टरांनी त्यांना खोकल्याचं औषध दिलं. खोकल्याचं हे औषध प्यायल्यानंतर या लहान मुलांची तब्येत बिघडली. काही दिवसांनी या लहान मुलांचं लघवी करण्याचे प्रमाण कमी झालं. पुढील काही दिवसांत या लहान मुलांची किडनी फेल झाली. याआधी ६ लहान मुलांचा मृत्यू झाला होता. मात्र, या प्रकरणात आकडा वाढतच चालला आहे.

कफ सिरप प्रकरणामुळे नागरिकांमध्ये चिंता वाढली आहे. छिंदवाडा या भागात या प्रकरणाचा अधिक प्रभाव दिसत आहे. मध्य प्रदेश व्यतिरिक्त राजस्थानच्या भरतपूर आणि सीकरमध्ये तीन मुलांचा कफ सिरप पिऊन झाल्याचं समोर आलं आहे. यामुळे राजस्थानच्या नागरिकांमध्ये चिंता वाढली आहे.

कफ सिरपचं हे पहिलं प्रकरण ७ सप्टेंबर रोजी समोर आलं होतं. ५ वर्षीय अदनान खानला ताप आणि उलट्या झाल्याने रुग्णालयात दाखल करण्यात आलं होतं. अदनानची तब्येत आणखी वाढल्याने पुढील उपचारासाठी नागपूरला पाठवण्यात आलं होतं. त्यावेळी डॉक्टरांनी अदनानच्या दोन्ही किडनी फेल झाल्याचं सांगितलं. त्यानंतर मध्य प्रदेशातील विविध भागात ९ लहान मुलांचा मृत्यू झाल्याची माहिती समोर आली.

प्रशासनाने सुरुवातीला पाणी आणि उंदराचे नमुने घेतले होते. मात्र, त्याचे रिपोर्ट निगेटिव्ह आले. राजस्थानमध्ये कफ सिरपमुळे ३ मुलांचा मृत्यू झाला आहे. दोन्ही राज्यात मिळून १२ मुलांचा मृत्यू झाला आहे. आरोग्य विभागाने या प्रकरणानंतर डॉक्टर आणि फार्मासिस्टला निलंबित करण्याचा निर्णय घेतला आहे. या संपूर्ण प्रकरणात आरोग्य विभागाने महत्वाच्या सूचना देखील जारी केल्या आहेत.