Plane Crash: टेकऑफनंतर रडारमधून झालं गायब; रशियन लष्कराचं विमान कोसळलं, २९ जणांचा मृत्यू

रशियाच्या संरक्षण दलाचे एक विमान कोसळले असून या दुर्घटनेत २९ जणांचा मृत्यू झाला आहे. क्रिमिया बेटावर रशियाचं अँटोनोव्ह-२६ हे लष्करी मालवाहू विमान कोसळलं असून या दुर्घटनेत ६ क्रू मेंबर्स आणि २३ प्रवासी अशा एकूण २९ जणांचा मृत्यू झाला आहे. रशियाच्या संरक्षण मंत्रालयाने याबाबतची माहिती दिली आहे.

मिळालेल्या माहितीनुसार, ३१ मार्च रोजी संध्याकाळी ६ च्या सुमारास हे विमान क्रिमियाच्या आकाशात असताना त्याचा नियंत्रण कक्षाशी संपर्क तुटला. रडारवरून विमान गायब झाल्याचं लक्षात येताच शोध आणि बचाव पथक कामाला लागले. काही तासांतच बचाव पथकाला विमानाचा ढिगारा सापडला. रशियाच्या संरक्षण मंत्रालयाने या दुर्घटने प्रकरणी म्हटले की, हा अपघात तांत्रिक बिघाडामुळे झाला असावा.

रॉयटर्सच्या वृत्तानुसार, मंगळवारी स्थानिक वेळेनुसार संध्याकाळी ६ वाजण्याच्या सुमारास विमानाशी संपर्क तुटला होता. विमानावर कोणत्याही हल्ला झाला नाहीये. तशी कोणतीच चिन्हे नाहीत. त्यामुळे क्षेपणास्त्रे, ड्रोन किंवा पक्ष्यांची धडक बसून हा अपघात झाला नाही. अपघाताच्या कारणांची चौकशी करण्यासाठी एक लष्करी आयोग पाठवण्यात आला आहे.

हे 'अँटोनोव्ह-२६' मॉडेल विमान रशियाच्या ताफ्यातील जुनं आणि विश्वासार्ह मानलं जातं. विमान आहे. या विमानांची निर्मिती १९६९ ते १९८६ या काळात युक्रेन येथील कारखान्यात करण्यात आली होती. रशियाने आतापर्यंत अशी एकूण १३९८ विमानं तयार केली असून ती हंगेरीपासून क्युबापर्यंत अनेक देशांना विकली आहेत.