Car Accident News : महामार्गावर भीषण अपघात! कारचा चक्काचूर,४ मित्रांचा मृत्यू , दोघे जखमी

राजस्थानमध्ये भरधाव कारवरील नियंत्रण सुटल्याने झालेल्या भीषण अपघातात ४ तरुणांचा दुर्दैवी मृत्यू झाला, तर अन्य दोघे गंभीर जखमी झाले आहेत. जयपूर जिल्ह्यातील रायसर परिसरात राष्ट्रीय महामार्ग क्रमांक १४८ वर आज सकाळी हा अपघात घडला. कारचा टायर अचानक फुटल्यामुळे चालकाचे वाहनावरील नियंत्रण सुटले आणि कार रस्त्यालगत असलेल्या दरीत जाऊन कोसळली. या घटनेमुळे परिसरात खळबळ उडाली असून, अपघातात मृत्युमुखी पडलेल्या तरुणांच्या कुटुंबीयांवर दुःखाचा डोंगर कोसळला आहे.

मिळालेल्या माहितीनुसार, कारमध्ये एकूण सहा मित्र प्रवास करत होते. हे सर्व तरुण उत्तर प्रदेशातील आग्रा येथील रहिवासी होते. खाटूश्यामजी मंदिरात दर्शन घेतल्यानंतर ते आपल्या घरी परतत होते. प्रवासादरम्यान रायसर परिसरात अचानक कारचा टायर फुटला. त्यामुळे चालकाला वाहनावर नियंत्रण मिळवता आले नाही. काही क्षणांतच कार रस्त्यावरून घसरून दरीत कोसळली.

अपघाताची तीव्रता इतकी मोठी होती की, अतुल, मुकुल, रूपेश आणि शिवा या चार तरुणांचा मृत्यू झाला. तर राहुल आणि अर्पित हे दोघे गंभीर जखमी झाले आहेत. अपघाताची माहिती मिळताच स्थानिक पोलीस घटनास्थळी दाखल झाले. त्यांनी बचावकार्य सुरू केले. जखमी दोघांनाही जयपूरमधील निम्स रुग्णालयात दाखल करण्यात आले असून, त्यांच्यावर उपचार सुरू आहेत. शुक्रवारी पहाटे सुमारे सहा वाजण्याच्या सुमारास हा अपघात झाल्याचे पोलिसांनी सांगितले. घटनेनंतर महामार्गावर वाहनचालकांची गर्दी झाली आणि वाहतुकीची मोठी कोंडी निर्माण झाली. पोलिसांनी घटनास्थळाची पाहणी करून अपघाताची माहिती गोळा केली. तसेच अपघातग्रस्त कार बाजूला करण्याचे आणि वाहतूक पूर्ववत करण्याचे प्रयत्न करण्यात आले.

या प्रकरणी सीओ रामकिशन विश्नोई यांनी चार तरुणांचा मृत्यू झाल्याची आणि दोघे गंभीर जखमी असल्याची माहिती दिली. प्राथमिक माहितीनुसार, टायर फुटल्याने हा अपघात घडला. मात्र, दुर्घटनेची माहिती घेण्यासाठी पोलिसांकडून पुढील तपास केला जात आहे. या घटनेमुळे पुन्हा एकदा महामार्गावरील वेग आणि वाहनांची सुरक्षितता यांचा प्रश्न ऐरणीवर आला आहे.