Heavy Rain Alert : महाराष्ट्रासह ९ राज्यांत आज पावसाचा इशारा; वाचा कुठे कुठे कोसळणार पाऊस

मान्सूनने परतीचा प्रवास सुरु केल्यानंतर पावसाने चांगलाच जोर पकडला आहे. मागील आठवडाभरापासून देशातील विविध भागात मुसळधार पाऊस पडत आहे. नेपाळमध्ये झालेल्या पावसामुळे बिहारमध्ये पूरस्थिती निर्माण झाली आहे. या नैसर्गिक आपत्तीचा फटका 16 जिल्ह्यांतील 12 लाखांहून अधिक लोकांना बसला आहे. दुसरीकडे महाराष्ट्रात पावसाने उघडीप दिली असून तापमानात वाढ होत आहे.

अशातच महाराष्ट्रासह ९ राज्यात आज मुसळधार पाऊस कोसळणार, असा अंदाज हवामान विभागाने वर्तवला आहे. राज्यातील सिंधुदूर्ग, रत्नागिरी, रायगड, कोल्हापूर, सांगली, सोलापूर, सातारा जिल्ह्यात तुरळक ठिकाणी पावसाची शक्यता आहे. याशिवाय पुणे, नगर, रायगड, धुळे, धाराशिव आणि लातूर जिल्ह्यात काही ठिकाणी पाऊस पडणार आहे.

इतर भागात ढगाळ वातावरण राहणार असून पावसाची उघडीप राहील, असंही हवामान खात्याने सांगितलं आहे. दुसरीकडे आसाम, मेघालय, अरुणाचल प्रदेश, नागालँड, मणिपूर, मिझोराम आणि त्रिपुरामध्ये विजांचा कडकडाट आणि ढगांच्या गडगडाटासह अतिवृष्टीचा इशारा देण्यात आला आहे.

याशिवाय केरळ आणि तामिळनाडू या दक्षिणेकडील राज्यांमध्ये मुसळधार पावसाचा अंदाज वर्तवण्यात आला आहे. विशेष म्हणजे, मान्सूनने २३ सप्टेंबरला परतीचा प्रवास सुरु केल्यानंतर राजस्थान आणि गुजरातच्या काही भागातून माघार घेतली होती. परंतु त्यानंतर २४ सप्टेंबरपासून मात्र आपला मुक्काम कायम ठेवला. मंगळवारी (ता. १) देखील मान्सूनचा प्रवास थबकला होता.

दरम्यान, मध्य प्रदेश आणि दक्षिण गुजरातमधील चक्राकार वाऱ्यांची स्थिती निवळून गेली आहे. त्यामुळे हवेत कमी दाबाचा पट्टा सक्रिय झाला आहे. हा पट्टा उत्तर कोकणापासून आग्नेय उत्तर प्रदेशापर्यंत सक्रिय आहे. त्यामुळे येत्या ४ ते ५ दिवसात महाराष्ट्रातील काही भागात जोरदार पाऊस होईल, असंही आयएमडीने सांगितलं आहे.