आधी दुचाकीवरून जाताना अपघात, नंतर हार्ट अटॅक; प्रसिद्ध गायकाची प्रकृती गंभीर, मुख्यमंत्र्यांची पोस्ट व्हायरल

शनिवारी हिमाचल प्रदेशातील सोलन जिल्ह्यात झालेल्या एका भीषण रस्ते अपघातात पंजाबी गायक राजवीर जवंदा गंभीर जखमी झाले. पोलिसांनी दिलेल्या माहितीनुसार, राजवीर मोटारसायकलवरून शिमलाला जात होते. बद्दी परिसरात त्यांचा मोटारसायकलवरून नियंत्रण सुटले. त्यांच्या मोटारसायकलचा भीषण अपघात झाला. अपघातानंतर त्यांना ह्रदयविकाराचा झटकाही आल्याची माहिती आहे.

अपघातानंतर गायक राजवीर यांच्या डोक्याला आणि पाठीच्या कण्याला गंभीर दुखापत झाली. सध्या ते व्हेंटिलेटवर उपचार घेत आहेत, असे फोर्टिस हॉस्पिटलने एका निवेदनात म्हटलं आहे. आज सकाळी जवंदा यांच्या दुचाकीचा गंभीर अपघात झाला. मोहालीतील फोर्टिस हॉस्पिटलमध्ये आणण्यापूर्वी त्यांना ह्रदयविकाराचाही झटका आला होता.

फोर्टिस हॉस्पिटलमध्ये त्यांच्यावर उपचार सुरू आहेत. त्यांची प्रकृती अजूनही गंभीर आहे. डॉक्टरांचे विशेष पथक त्यांच्यावर बारकाईने लक्ष ठेवून आहे. पंजाबचे मुख्यमंत्री भगवंत मान, शिक्षण मंत्री हरजोत सिंह बैंस, पंजाब कांग्रेसचे प्रमुख अमरिंदर सिंह राजा वारिंग यांच्यासह अनेक राजकारण्यांनी त्यांच्या लवकर बरे होण्यासाठी प्रार्थना केली आहे.

पंजाबचे मुख्यमंत्री भगवंत मान यांनी इंस्टाग्रामवर लिहिले की, 'मला माहिती मिळाली की, प्रसिद्ध पंजाबी गायक राजवीर जवंदा यांचा हिमाचल प्रदेशात अपघात झाला. ते दुचाकीवरून जात असताना अपघात झाल्याची माहिती आहे. ते अपघातात गंभीर जखमी झाले. त्यांची प्रकृती चिंताजनक आहे. मी त्यांच्या लवकर प्रकृती सुधारासाठी प्रार्थना करतो', असं ते म्हणाले.