PM Modi Death Threat: पंतप्रधान मोदींना जीवे मारण्याची धमकी; जगभरात खळबळ, तपास यंत्रणा सतर्क

पंतप्रधान नरेंद्र मोदी हे ९ जुलै रोजी ऑस्ट्रेलियाच्या दौऱ्यावर जाणार आहेत. मोदींच्या दौऱ्याआधी पंतप्रधान मोदींना जीवे मारण्याची धमकी आली आहे. पंतप्रधान मोदींना धमकी येताच सुरक्षा यंत्रणा सतर्क झाल्या आहेत. पंतप्रधान मोदी हे मेलबर्नमध्ये 'मेलबर्न मीट्स मोदी' (Melbourne Meets Modi) कार्यक्रमात सहभागी होणार आहेत. त्याच कार्यक्रमासंदर्भात सोशल मीडियावर त्यांना जीवे मारण्याची धमकी आली आहे.

याप्रकरणी ऑस्ट्रेलियन फेडरल पोलिसांनी (AFP) या प्रकरणाचा तपास सुरू केला आहे. ऑस्ट्रेलियातील प्रसारमाध्यमांच्या वृत्तानुसार, मेलबर्नच्या 'मार्व्हल स्टेडियम'वर आयोजित एका सामुदायिक कार्यक्रमाच्या जाहिरातीसाठी केलेल्या फेसबुक पोस्टखाली ही धमकी देण्यात आली होती. पंतप्रधान मोदींच्या ऑस्ट्रेलिया दौऱ्यातील हा एक अत्यंत महत्त्वाचा कार्यक्रम मानला जातोय.

फेसबूकवर आली धमकी

मिळालेल्या माहितीनुसार, 'अबू मुस्तफा' नावाच्या फेसबुक अकाऊंटवरून एक धमकीची कमेंट करण्यात आली होती. यात म्हटले होते की, "कार्यक्रमादरम्यान स्टेडियमचे छत बंद राहिले तरच बरे होईल; अन्यथा, ऑस्ट्रेलिया इथे आपला मृत्यू ओढवून घेण्यासाठी येत आहे." ही पोस्ट समोर येताच हे प्रकरण ऑस्ट्रेलियन फेडरल पोलिसांकडे सोपवण्यात आले आहे.

तपास यंत्रणेकडून आयपी (IP) ॲड्रेसचा शोध सुरू

मिळालेल्या माहितीनुसार तपास यंत्रणांनी सोशल मीडियावरील पोस्टशी संबंधित आयपी (IP) ॲड्रेस शोधून काढला आहे. आता ती कमेंट कोणी केली आणि त्यामागील उद्देश काय होता, याचा शोध घेतला जातोय. तसेच, या प्रकरणात कोणत्याही फौजदारी कायद्यांचे उल्लंघन झाले आहे का, याचीही तपासणी अधिकारी करत आहेत.