Pakistan Blast: इमारतीत भीषण स्फोट; पाकिस्तान हादरलं! ९ मुलांसह १६ जणांचा मृत्यू, १४ जखमी

रमजान महिन्याच्या पहिल्याच दिवशी पाकिस्तानात दुखद घटना घडलीय. कराचीमधील एका अपार्टमेंटमध्ये मोठा स्फोट झाला असून यात १६ जणांचा मृत्यू झालाय. तर १४ जण जखमी झाले आहेत. सिंध प्रांताची राजधानी कराची येथील एका निवासी भागात हा स्फोट झाला. दरम्यान इमारतीच्या मलब्याखाली अनेकजण अडकल्याची भिती व्यक्त केली जातेय. बचाव दल मदतकार्य करत असून मलब्याखाली कोणी अडकले आहे का? याचा शोध घेतला जात आहे.

गुरुवारी सकाळी एका इमारतीत झालेल्या गॅस गळतीमुळे स्फोट झाला असून यात १६ जणांचा मृत्यू झाला आहे. मृतांमध्ये मुलांचा समावेश आहे. तर १४ जण जखमी झाले. पोलीस अधिकारी जमशेद अश्रफ यांनी दिलेल्या माहितीनुसार, जुना सोल्जर बाजार परिसरातील इमारतीच्या पहिल्या मजल्यावर पहाटे ४:३० वाजता हा स्फोट झाला.

एका पोलीस अधिकाऱ्याने सांगितले की हा स्फोट गॅस गळतीमुळे झाला असावा. तपास पूर्ण झाल्यानंतर अधिक तपशील सांगितला जाईल. मुख्य अग्निशमन अधिकारी हुमायून खान यांनी माध्यम प्रतिनिधींना सांगितले की., "आम्ही अजूनही ढिगाऱ्यातून शोध घेत आहोत आणि आणखी मृतदेह किंवा वाचलेले लोक आहेत का त्याचा शोध घेतला जातोय.

मृतांमध्ये २ ते १७ वयोगटातील किमान नऊ मुले आहेत, तर ७ जण जखमी झाले आहेत. त्यांनी सांगितले की, स्फोट झाल्यामुळे इमारतीचा एक भाग कोसळला. दरम्यान कराचीमध्ये गॅसच्या कमतरतेमुळे कमी उत्पन्न असलेल्या भागातील लोक त्यांच्या घरात एलपीजी सिलिंडर वापरतात.

दरम्यान यावर्षी कराचीमध्ये घडलेली ही दुसरी मोठी दुर्घटना आहे. गेल्या महिन्यातही सदर परिसरातील एका बाजारातील गुल शॉपिंग प्लाझा इमारतीच्या तळघरात आग लागली होती. घटनेत किमान ७९ लोकांचा मृत्यू झाला होता आणि अनेक जण जखमी झाले होते. याआधीही जुलै महिन्यात पाकिस्तानची राजधानी इस्लामाबाद येथे एका घरात लग्नाच्या रिसेप्शन गॅस स्फोट झाला होता. यात वधू-वरांसह आठ जणांचा मृत्यू झाला होता.