Nursery Student Heart Attack: नर्सरीतून घरी येताना ५ वर्षाच्या मुलीला हृदयविकाराचा झटका; बसमध्येच चिमुकलीचा मृत्यू

उत्तर प्रदेशातील अमरोहा येथून एक दुःखद घटना घडलीय.स्कूल बसमधून घरी परतताना एका ५ वर्षाच्या मुलीचा मृत्यू झालाय. अमरोहा जिल्ह्यातील राहारा पोलीस स्टेशन परिसरात ही घटना घडलीय. नित्या शर्मा, असं मृत मुलीचे नाव असून ती हैदलपूर गावात ही मुलगी आपल्या कुटुंबियांसोबत राहत होती.

नित्या रहारा परिसरातील एका खासगी शाळेच्या नर्सरीच्या वर्गात शिकत होती. शाळेतून बसने घरी परताना नित्याला हर्ट अटॅक आला, त्यात तिचा मृत्यू झाला. त्यानंतर तिच्या कुटुंबियांनी कोणतीच तपासणी न करता मुलीवर अंत्य संस्कार केले. मिळालेल्या माहितीनुसार, नित्या नेहमीप्रमाणे सोमवारी शाळेत गेली होती. दुपारी शाळा सुटल्यानंतर ती आपल्या इतर मैत्रिणीसह स्कूल बसमधून घरी येत होती. वाटेतच तिची तब्येत बिघडली.

तिला श्वास घेण्यास त्रास होऊ लागला. बसमधील इतर मुलींना काही कळण्याआधीच नित्याचा मृत्यू झाला. दरम्यान ही माहिती मिळताच नित्याच्या कुटुंबियांनी घटनास्थळी धाव घेतली. त्यानंतर नित्याला एका खासगी रुग्णालयात नेण्यात आलं, जिथे डॉक्टरांनी तिला मृत घोषित केलं. मुलीच्या वडिलांच्या म्हणण्यानुसार, नित्याचा मृत्यू ऑक्सिजनच्या कमी पातळीमुळे झाल्याचं डॉक्टरांनी सांगितलं.

नित्या दोन बहिणींमध्ये लहान होती. शरिरातील ऑक्सीजन कमी झाल्यानं नित्याचा मृत्यू झाल्याचं डॉक्टरानं सांगितलं. रहारा आरोग्य सार्वजनिक केंद्राचे डॉक्टर म्हणाले की, मुलीचा मृत्यू हर्ट अटॅकने झाल्याचं नोंद करण्यात आली नाहीये.