जत्रेला जाणाऱ्या भक्तांवर काळाचा घाला; भरधाव वाहन ७०० मीटर खोल दरीत कोसळलं, २० जणांचा मृत्यू

नेपाळमधून भीषण अपघाताची धक्कादायक घटना समोर आली आहे. जत्रेला जाणाऱ्या २० प्रवाशांचा भीषण अपघातात मृत्यू झाला आहे. नेपाळमधील थवांग नगरपालिकेच्या जलचाला हद्दीत ही दुर्घटना घडली. पावसामुळे रस्त्यावरील चिखलामुळे प्रवाशांनी भरलेली जीप घसरून थेट खोली दरी कोसळली. ७०० फूट दरीत जीप कोसळल्याने एकूण २० प्रवाशांचा मृत्यू झाला आहे. या अपघाताने संपूर्ण नेपाळमध्ये खळबळ उडाली आहे.

पोलिसांनी दिलेल्या माहितीनुसार, नेपाळच्या रोल्पा जिल्ह्यात जत्रेला जाणाऱ्या जीपचा अपघात झाला. डोंगराळ भागातून जाताना जीप रस्त्यावरून थेट ७०० मीटर खोल दरीत कोसळली. यात २० जणांनी प्राण गमावले. थवांग नगरपालिकेच्या जलजाला हद्दीत अपघाताचा थरार घडला. डोंगराळ भागात जोरदार पाऊस झाल्याने चिखलामुळे जीप घसरून खाली कोसळल्याचा अंदाज व्यक्त करण्यात येत आहे.

२० जणांच्या मृत्यूने संपूर्ण परिसरात शोककळा पसरली आहे. अपघात झाल्याची मिळताच पोलीस आणि बचाव पथकाने घटनास्थळी धाव घेतली. त्यानंतर तातडीने रेस्क्यू ऑपरेशन सुरू केलं. आताही पोलीस आणि बचाव पथकाकडून कार्य सुरू आहे. २० जणांच्या मृत्यूने त्यांच्या कुटुंबावर दु:खाचा डोंगर कोसळला आहे.

तत्पूर्वी, नेपाळमध्ये जलजालासारखाच भीषण अपघात आणखी एका ठिकाणी झाला होता. दुसऱ्या अपघातात १२ जणांचा मृत्यू झाला. नेपाळच्या मध्य भागात १० फेब्रुवारी अपघाताची घटना घडली होती. अपघातावेळी बसमधील १२ प्रवासी होते. तर ८ जण गंभीर जखमी झाले. अपघातानंतर पोलिसांनी तातडीने बस चालकाला ताब्यात घेतलं आहे. ही बस काठमांडूहून ओखलढुंगा या भागात चालली होती. याचदरम्यान बागमती प्रांतातील रामेछाप नगरपालिका बसचाही अपघात झाला होता. पालिकेची बस तामाकोशी नदीत कोसळली होती.