Nellore Accident: आजारी नातेवाईकाला भेटायला जाताना अपघात; भरधाव ट्रकची कारला धडक, एकाच कुटुंबातील ६ जणांचा मृत्यू

आजारी नातेवाईकाला भेटायला जाणाऱ्या एकाच कुटुंबातील ६ जणांचा अपघाती मृत्यू झाल्याची घटना घडली आहे. आंध्रप्रदेशच्या नेल्लोर जिल्ह्यात ही अपघाताची घटना घडली आहे. भरधाव ट्रकच्या धडकेनंतर कारचा चेंदामेंदा झाला. अपघाताची माहिती मिळताच पोलीस आणि अग्निशमन दलाने घटनास्थळी धाव घेतली.

ट्रकच्या ओझ्याखाली कार दबली गेली. या भीषण अपघातात कारमधील ६ पैकी एक जणही बचावला नाही. टी. राधा (३८), टी. श्रीनिवासुसु (४०), शेषम सरम्मा(४०), बालवेंगय्या (४५), चल्लागुंडला लक्ष्मी (३०), चंदू प्रिया (१५) यांचा अपघातात मृत्यू झाला.

अधिकाऱ्यांनी सांगितलं की, 'ट्रकने जोरदार धडक दिली की, कारमधील लोक पूर्णपणे दबले गेले. अपघातातील लोकांचे मृतदेह पोलीस आणि अग्निशमन दलाच्या जवानांनी कारमधून बाहेर काढले. त्यानंतर त्यांचे मृतदेह शवविच्छेदनासाठी सरकारी रुग्णालयात पाठवण्यात आले. ६ जणांच्या मृत्यूने त्यांचे कुटुंबीय आणि नातेवाईकांवर दु:खाचा डोंगर कोसळला आहे.

जिल्हा परिवहन आयुक्तांनी सांगितलं की, 'पेरामनजवळील रस्ते अपघातात ६ लोकांचा जागीच मृत्यू झाला. प्राथमिक माहितीनुसार, ट्रक चालक चुकीच्या मार्गावरून गाडी चालवत होता. अपघाताची माहिती मिळताच जिल्हा अधिकारी घटनास्थळी पोहोचले होते. पोलिसांनी या अपघातप्रकरणी तपास सुरु केला आहे.

विजेचा धक्का बसून एकाचा मृत्यू

महोबा जनपदच्या खरेला पोलीस स्टेशनच्या एचाना गावात पावसादरम्यान दुर्दैवी घटना घडली. गावातील दाम्पत्य किचनमध्ये जेवण करण्यात व्यग्र होतं. त्याचवेळी दोन्ही नवरा-बायकोंना विजेचा धक्का बसला. यात पती सुबेदार यांचा जागीच मृत्यू झाला. तर पत्नी आशादेवी या गंभीर जखमी झाल्या. आशादेवी यांच्यावर रुग्णालयात उपचार सुरु आहेत.